Diabierna ultimo Ministerio Publico a manda un comunicado di prensa informando cu diahuebs ultimo, 16 di maart, Corte Superior a dicidi cu señor Candelario (Booshi) Wever no ta admisibel den e keho cu el a wordo entrega contra ex-minister Otmar Oduber pa loke ta trata cumpra di incinerador chikito.

Den e comunicado a señala cu Wever a dirigi su keho contra e hecho cu Ministerio Publico no a tuma un decision pa persigui, entre otro, minister anterior Otmar Oduber pa soborno, falsificacion y estafa acerca di e aanbesteding y gunning di compra di e incinerador chikito na dump di Parkietenbos.

Contra e hecho aki di Ministerio Publico Wever a entrega un keho na Hof na october 2022. Su keho pues a wordo declara inadmisibel.

E caso aki ta bin for di december di aña 2019 na unda Wever a bay Ministerio Publico pa entrega un denuncia contra e ex-mandatario y a entrega tur e pruebanan cu mester pa cuminsa haci un investigacion, incluyendo parlamentarionan, manera el a sigura, pero esey no a sucede.

Wever a informa cu na comienso di aña 2019 partido UPP a haci un peticion na Oduber pa entrega nan e copia di documentonan di onderhandse aanbesteding di e incinerador chikito y nan a bay pa un procedura di LAR cu despues nan a haya e documento.

E ta sigura cu tabatin iregularidadnan rond di destaho publico pa loke ta trata e incinerador aki, cual tabata diseña pa exclui otro companianan di participa. Un incinerador cu segun e ta declara, el a bin sin dryer.

Despues nan a haya tempo pa studia y analisa locual nan a sospecha for di comienso: cu tabatin un abuso di poder. Pero tambe tin un cambio di cifranan, cifranan cu no ta cuadra precisamente cu e placa cu tabata disponibel na e momento ey: aumento di prijs pa haya casi tur 1.8 miyon florin. Esey a cambia e situacion cu ta bisa kico mester wordo haci y kico ta ofrece pa e solucion di kimamento di desperdicio medico.

Wever tambe a comenta cu un otro compania a sali miho y a cambia e procedura. A split e destaho publico papiando di incinerador chikito pero tambe e operacion di dje. Nan a pone un parti di e incinerador cu DOW a cumpra y e otro parti cu Serlimar mester cumpra, pa motibo cu si nan a pone hunto e compania cu ta sponsor—segun Wever mes a bisa—e amigonan di Oduber lo a sali hopi mas caro.

Na mei di aña 2020, Bon Dia Aruba a haci un entrevista cu Wever na unda na e momento ey el a expresa cu “si Ministerio Publico ta bisa mi cu nan no tin motibo pa persigui Otmar Oduber, mi ta bay HOF.” Esaki tabata pa motibo cu e ta considera cu ta inaceptabel cu Ministerio Publico, cu tur e documento cu el a presenta nan, por yega na e conclusion cu no tin un ‘strafbaarfeit’ y awor e caso a bay te HOF pa nan por haci un investigacion, algo cu a culmina diahuebs ultimo unda HOF a declara inadmisibel su keho.