E topico cu man e hobennan y muchanan ta trece dilanti ora cu nan ta tuma contacto cu Telefon Pa Hubentud (131) ta sexualidad y unda nan por haya proteccion. Esaki segun cifra cu e fundacion aki a caba di traha di 2015.
Pero tin otro tipo di preocupacion cerca nos muchanan y hobennan cu tin di haber cu termento, falta di comunicacion cu mayornan, asina director di fundacion Telefon Pa Hubentud, drs. James Sneek a declara.
Mal comunicacion cu mayornan
Drs. Sneek a bisa cu ora cu e hobennan ta yama nan ta admiti cu nan tin un mal comunicacion, ya sea cu e tata of mama, pero nan deseo ta esun di drecha esaki.
“Nan ta puntra con mi por drecha esaki”, el a bisa. Nan intencion no ta esun di keha contra un mayor, pero loke nan ta spera ta di por tin un miho relacion cu nan mayor.
Normalmente e grupo cu ta yama ta alrededor di 8 pa 24 aña. Pero tin personanan cu ta yama nan cu tin 30 aña, y cu a cuminsa yama e fundacion aki tempo cu nan tabata un mucha di apenas 8 aña.
El a bisa cu nos tur sa cu atencion special ta wordo poni riba loke ta e comportacion di nos hobennan y muchanan na Aruba, y p’esey nan ta haci un solicitud na nos comunidad pa asina e fundacion aki lo por conta cu mas boluntario.
Boluntarionan nobo
E fundacion aki a drenta den e luna cu normalmente nan ta busca nan boluntarionan nobo. Fei 1999 cu e fundacion aki a cuminsa existi, nan ta depende di e trabou boluntario pa nan por draai y atende e yamadanan cu ta drenta na nan telefon 131, pero tambe e-mailnan cu ta drenta y mensahenan cu ta wordo contesta.
Actualmente nan tin 24 boluntario activo cu ademas di contesta e telefon clave aki pa yuda e muchanan, nan ta yuda tambe cu proyectonan y presentacion den diferente scol. E fundacion ta hopi contento di e stabilidad di nan grupo di boluntario, ya cu mayoria di nan boluntario ta cu nan durante casi 8 aña. E stabilidad aki tin di haber cu e inversion cu nan ta haci den nan cuerpo di boluntario pa haci nan mas sostenibel. “Constantemente nos ta keda inverti den nos boluntarionan”, segun drs. Sneek.
Durante e luna aki e fundacion ta purba di haya mas boluntario posibel, ya cu durante dia nan ta traha cu dos grupo cu ta bay fei 2’or atardi pa 4’or; y tambe fei di 4’or atardi pa 6’or atardi, y pa realisa e trabou aki nan mester semper di dos hende sinta pa atende e telefon. Nan ta atende yamada den e orarionan ey fei di dialuna te cu diadomingo. Banda di esey nan mester di boluntario pa atende diferente proyecto cu nan ta realisa durante e aña, ya cu ta diferente e trabou cu e boluntarionan ta haci.
Caracteristica di e boluntario
E persona interesa lo por solicita cerca e fundacion aki, ya cu durante e luna aki nan lo realisa e entrevistanan, y na luna di mei nan lo cuminsa cu loke ta e training. E training ta dura henter un luna riba diferente tema rond e problemanan cu ta biba cerca nos hobennan y muchanan di Aruba.
E training aki ta basta pisa y intensivo pa asina nan por ta bon prepara pa duna un bon conseho y informacion na nos hobennan. Despues na luna di juni lo cuminsa un periodo di tres siman di stage unda e boluntarionan lo por cuminsa funciona.
“Nos ta pidi e pueblo di Aruba y personanan cu tin un afinidad cu hobennan y muchanan pa solicita pa bira boluntario di Telefon pa Hubentud. Nos mester di boso ayudo…”, drs. Sneek a bisa.
E boluntario lo por ta persona fei 16 aña pa dilanti. Aunke 16 aña ta un edad basta tempran, drs. Sneek ta argumenta cu nan kier pa e hobennan tambe ta activo den e participacion di hubentud den e fundacion aki. Un factor determinante pa recluta boluntario nobo ta cu e candidato mester tin afinidad pa loke ta hoben y mucha; y si nan ta envolvi cu cierto actividad pa ehempel duna training den club deportivo cu tin di haber cu hoben.
Informacion confidencial y anonimo
Tambe tur boluntario ta pasa den un proceso di screenmento pa asina determina ki tipo di persona nan ta treciendo pa nan organisacion. Tur informacion y comunicacion di e hobennan ta keda confidencial. Drs. Sneek a bisa cu den su casi 17 aña di existencia te ainda niun informacion di hobennan y muchanan cu a yama na Telefon Pa Hubentud a sali ariba caya.
“Nos ta hopi orguyoso di esey”, el a bisa. E parti anonimo ta un punto cu nan ta haci hopi enfasis durante e training cu e boluntarionan, ya cu nan tambe ta keda anonimo, pero e informacion cu ta drenta ta keda confidencia, y e no mag di sali pafo.
Nan ta registra loke ta e tema cu generalmente e hobennan y e muchanan ta trece dilanti cerca nan pa asina nan por tin un bista di kico ta pasa bou nos hobennan y muchanan di Aruba. Tampoco nan no ta registra adres, nomber y tampoco number di telefon. “Tur muchanan y hobennan cu ta yama akinan ta anonimo…”, el a bisa. Pa nan ta importante e problema cu e mucha tin pa asina duna nan e informacion cu nan mester.
.JPG "Telefon pa Hubentud Aruba yudando Colegio Papa Cornes di Bonaire")
