CEDE Aruba a cuminsa un colaboracion cu e programa Europeo di subsidio pa educacion, hubentud y deporte, esta Erasmus+.
Cu Erasmus+, intercambio y trabao boluntario ta wordo organisa y (co)financia. E programa di Erasmus+ cu CEDE Aruba ta colabora, yama European Voluntary Service (EVS). E idea tras di esaki ta cu tur hende por desaroya nan mes continuamente por medio di educacion, curso y siñamento informal: siñamento permanente (life long learning), segun e comunicado ricibi di CEDE Aruba.
E programa EVS ta brinda hobennan oportunidad pa haci trabao boluntario den exterior. Aki, nan ta cera conoci cu culturanan diferente y nan ta siña habilidadnan nobo.
Haciendo trabao boluntario por medio di e programa Erasmus+ hobennan lo optimalisa posibilidadnan pa un futuro bunita den e area di nan interes. E trabao boluntario na e organisacion aki lo consisti di traha cu personanan cu limitacion mental, riba varios areanan manera cuido, deporte y recreacion.
Na e momento aki CEDE Aruba tin oportunidad pa manda 2 hoben pa un periodo di mas o menos 2 luna cerca su partner na Spaña. E trabao boluntario lo tuma luga den periodo juni/juli/augustus. Pa cualifica, e hobennan mester ta entre 18 y 30 aña di edad. Un parti di e gastonan lo wordo cubri pa e programa mes y e otro parti e hobennan lo tin cu percura pa cubri esaki, por ehempel cu organisacion dii proyectonan pa recauda fondo.
Tin otro rekisitonan cu e hobennan tin pa tene cuenta cu esaki. Entre otro, prome cu e hobennan participa na e programa di Erasmus+, nan tin pa sigui diferente cursonan, durante e periodo cu e hobennan ta haci trabao boluntario esaki mester wordo documenta y, na final, nan tin cu duna un presentacion di locual nan a siña.
Tambe nan tin cu traha hunto cu organisacionnan local, cu tin metanan similar cu e partner na Spaña. E hobennan lo wordo supervisa pa CEDE Aruba, prome, durante y despues di e periodo di trabao boluntario afo, e comunicado ta finalisa.
