(NLTimes) – Hobennan no ta sinti cu nan problemanan pa cu nan salud mental ta ser tuma na serio pa adultonan. Adultonan ta subestima y no ta duna prioridad na e hobennan su salud mental, segun nan a skirbi den Unicef Youth Advice 2022. Nan lo presenta esaki na parlamentarionan riba diabierna, cual ta dia di presupuesto di hobennan.
Ademas di mas atencion na nan salud mental, hobennan ta pidi e parlamentarionan duna prioridad na educacion y participacion di hobennan. Nan ta duna recomendacionnan concreto na con pa haci esaki.
Por ehempel, nan ta pidi pa asigna un persona den scolnan kendenan e hobennan por confia y ken sa con pa brinda sosten na e grupo cu tin mester di esaki. Politiconan y personanan cu ta crea politica mester tambe saca for di nan cabes e pensamento cu nan tin tocante educacion halto y primario. Ademas, nan mester pone menos enfasis riba e cantidad di studiante y e logronan cu e studiantenan tin. Educacion mester tambe enfoca mas riba e studiante individual, nan desaroyo y con pa mehora nan salud mental.
Hobennan a haci yamado na gobierno pa mehora nan comunicacion cu e hobennan y involucra nan den politica. “Tuma nos na serio. Tende nos ora cu nos tin problema y ora nos kier expresa algo y duna nos oportunidadnan tambe. Ora cu nos ta sinti cu nos ta ser tuma na serio y cu ta tende nos, nos lo sinti miho,” nan a bisa den e carta. “Nos ta yen di bon ideanan y nos ta compronde nos generacion miho cu cualkier otro persona.”
E reportahe, cual a ser skirbi pa 847 hoben entre 13 pa 18 aña di edad, lo ser entrega na Secretario di Estado Maarten van Ooijen di Salud Publico, Bienesar y Deporte riba diabierna.
