Tin un grupo di hoben cu casi henter nan bida ta na Aruba, pero cu ora di bira mayor di edad ta cay pafo di nos sociedad. Esaki ta e muchanan sin paspoort cu ta bisa Bon Dia Aruba cu nan kier contribui na nos pais y/of sigui studia, pero no ta haya e oportunidad.

Un factor importante ta cu nan mayornan no ta informa nan bon riba con e proceso ta hinca den otro. Of no ta percura pa nan yiu haya un paspoort Hulandes cu permiso pa keda biba na Aruba momento cu nan bira 18 aña. Permisonan di estadia ta mara na e edad di e mucha y e condicion cu nan ta biba na cas. Pero ora bira mayor di edad y tambe nan lo bay biba riba nan mes, e situacion legal di e hobennan ta cambia. Tambe tin casonan di muchanan unda e mayornan nunca a logra di regla nan permiso of caba cu e procedura di aplicacion.

Asina ta e storia tambe di Kenna Hernades. “Mi a bin biba  na Aruba cu 1 aña di edad. Mi mayornan semper tabata encarga cu mi peticion di permiso for di yegada na Aruba, y semper tabata busca permiso na Dimas unda den algun caso tabata tin falta di informacion of documento pa completa e peticion pa permiso. Como menor mi no tabata tin niun idea kico tabata pasando cu e procedura pa permiso y e rechasanan. Mi no tabata sa di e consecuencia cu lo bin pa mi den futuro. Mi semper a bay scol na Aruba sin problema. Cu 12 aña mi a drenta MAVO y despues a cuminsa un estudio na EPI. Na e momento cu mi cuminsa pensa di bay Hulanda pa studia como medisch laboratoriumonderzoek of lerares scheikunde, ma realisa cu esaki no lo ta posibel pa motibo cu mi no tin paspoort Hulandes. E opcion pa studia na Aruba no tabata al caso, mirando cu no tin e studionan manera menciona na pais Aruba y p’esey mi a haya mi mes obliga pa traha. Ta bon cu mi tabata tin un trabou caba y por a sigui cu ne.”

Un otro hoben, Luis Villegas, tambe a haya su mes den e situacion aki. E hoben ta conta cu e tin 20 aña ta bibando na Aruba. Na mayor di edad e la haya sa cu tin mester di 5 permiso pa completa su aplicacion pa un paspoort Hulandes. Sinembargo e 5 permiso cu mester pidi, semper tin un tardansa of ta wordo rechasa pa un rason of otro.  “Mi a crece ki nan. Pakico ainda mi no por haya un paspoort pa mi bay studia na Hulanda?”

E solucion no ta pa bay contra e ley, pero e ley mester wordo adapta of mehora, asina e hoben ta haya. E  ta spera cu e aña aki e por haya e papelnan necesario pa cuminsa e estudio na Hulanda. Mirando cu e scol a expande su aplicacion te september di 2017.

Paspoort
Pa por haya paspoort Hulandes mester mantene e status di ‘firma liber’ y cumpli cu e 10 añanan inscribi  na Censo y 10 permiso sin buraco. Na e momento cu un persona yega Aruba mester tin un permiso di estadia pa por inscribi su mes na e isla. Sin e esaki Dimas no ta inscribi un persona na e departamento.

Mayornan of doño di trabou por para garante pa un menor di edad. Ora e persona bira 18 aña mester cuminsa cu e procedura di permiso. E firma liber cu a wordo duna na menor di edad ta caduca na momento cu haci 18 aña. E persona por cuminsa aplica prome cu haci 18 aña pa permiso cu por traha of studia. Un persona cu tin 18 aña ta cay den e categoria di mayor di edad.

Na e momento ey mayornan lo por firma pa e yiu haya permiso di studiante. E permiso di studiante ta haya pa prome biaha, te na e momento cu ta termina un estudio. E permiso ta stipula cu ora un persona caba cu su estudio, ta bandonando e isla of si kier keda mester busca un doño di trabou cu ta firma pa e persona keda na Aruba. Den e caso aki mayornan no por firma permiso mas.

Cuanto hoben y studiante ta haya nan mes den problema cu permiso ora bira mayor di edad? Y nan ta realisa cu e proceso ta cuminsa na nan mayornan? Dimas no por a contesta riba e pregunta di con grandi e grupo di hoben ta. Y si e problema aki a crece como tin mas hende indocumenta na Aruba. E instancia si ta haya cu proceso di permiso pa muchanan ta cay bou responsabilidad di nan mayornan.

E  hoben Luis Villegas ta conclui: “Hopi biaha e personanan cu ta wordo limita pa motibo di ley, no kier expresa nan mes pa miedo di reaccion di sociedad. Pero un manera of otro mester informa publico di ki ta pasando den comunidad.”