Hobennan sin paspoort: con proyecto Dreamers lo yuda nos?

Dos siman pasa Bon Dia a entrevista dos hoben cu ta sinti cu nan ta “stuck” na Aruba pasobra despues di basta añanan bibando na Aruba ainda no a logra di haya paspoort Hulandes cu mester pa por studia afo. Awor nos a puntra nan kico nan ta pensa di e proyecto nobo, yama Dreamers, cu gobierno a lansa despues pa yuda nan haya firma liber.

Hoben Luis Villegas ta bisa cu e ta contento cu awor e por haya e firma liber. Segun e hoben Dimas a informa  cu e maneho nobo aki lo duna e hoben un oportunidad unda e lo por haci uzo di e proyecto pa asina haya e firma liber. “Pero  no a bisa specificamente kico e rekisitonan ta cu mester pa aplicacion”.

Despues di a entrega su papelnan pa aplicacion e hoben a bin di compronde cu e tabata tin falta di e papel di bon conducta, pa asina finalisa su aplicacion pa por haya e firma liber. E papel aki ta tuma algun tempo y placa pa por hay’e na tempo. “Mi a haya sa via medio di comunicacion cu lo bay tin nochi di informacion pero Dimas no a duna mi mucho informacion. Mi ta spera di haya mas detayenan durante e anochi di informacion.” E hoben ta wardando riba un respuesta di e departamento tocante su aplicacion pa permiso.

Hoben Kenna Hernades ta conta Bon Dia Aruba cu e ta haya e proyecto Dreamers un bon iniciativa. Pero pa logra haya e paspoort ainda lo tuma tempo. “E firma liber ta duna bo hopi derecho na Aruba. Pero e permiso no ta duna permiso pa por studia afo. Solamente un paspoort Hulandes ta haci esaki  posibel. Nos sa cu firma liber no ta duna mes un derechonan cu ora bo tin paspoort Hulandes. Hopi studiantenan ta bibando añanan na Aruba y nan kier bay studia afo esaki ta mas importante pa nan.”

Informacion robes
E hoben Hernades ta bisa cu tin personanan cu no a compronde mucho kico e proyecto Dreamers  ta encera. Via media comunicadonan online y radio ta bisa cu tur hende por aplica pa e permiso liber pero esaki ta informacion robes.

Anochi di informacion
Dimas ta preparando dos anochi di informacion cu ta tuma luga riba 5 y 12 di mei proximo y hunto cu ne, tur diabierna pa un termino di dos luna, e Departamento di Integracion, Maneho y Admision di Stranhero lo tin un loket special disponibel pa duna informacion, ricibi formulario di peticion y atende cu tipo di casonan aki. Segun e informacion cu Bon Dia Aruba ta haya tin hopi hobennan cu lo bay participa na e anochi di informacion.