Alex Pieters di departamento motorisa KPA ta splica Bon Dia Aruba cu mayoria di e casonan di accidente envolviendo scooter y brommer ta hobennan cu no tin experiencia den trafico, coriendo velocidadnan halto y treciendo nan mes constantemente den peliger.
Diamars mainta e accidente entre un auto y scooter cu a cobra bida di un hoben di 19 aña di edad tabata uno basta fuerte, cu a laga un otro victima cu tambe tabata riba e scooter, benta abao cu basta sla na curpa. Segun Polis, e pickup Isuzu a subi e caminda for di Caya Musica anto e chauffeur no a wak e scooter mes, ta solamente un golpi el a sinti. Bon Dia Aruba no a logra confirma si e hoben aki tabata tin un rijbewijs y si su papelnan tabata den ordo. Segun Sr. Alex Pieters, coremento di scooter y brommer chikito ta hopi na moda awor specialmente entre muchanan jong y hopi di nan ta yega subi un brommer of scooter sin experiencia den trafico y hopi sin rijbewijs. ”E persona cu ta hopi jong y ta core scooter of brommer chikito, no tin hopi experiencia pa core riba caminda. Pa varios otro hende cu tin añanan ta core auto y dicidi di bay over pa core un brommer por ehempel, e experiencia den trafico cu nan tin caba ta yuda nan anticipa e trafico y wak kico ta peligroso of no,” Sr. Pieters ta bisa.
Control polis lo bira mas detaya
Balashi ta yen di brommer y scooter cu Polis ta logra kita cu no tin papelnan riba dje of cu e persona no tin rijbewijs. Polis ta takel e scooternan y brommernan cu no ta cumpli cu rekisitonan pa ta riba caminda y awor conhuntamente cu DTI (Dienst Technische Inspectie), ta bay cuminsa bay mas detaya den esaki. ”Nos ta bay ta mas detaya riba e vehiculonan, si nan ta apto pa core riba caminda, si nan brik, tire of e vehiculo en general ta oke pa core,” Sr. Pieters ta bisa Bon Dia Aruba, enfatisando riba un moda nobo cu tin actualmente di core vehiculo di careda riba caminda publico. Departamento Motorisa kier pa comunidad compronde cu ora bo cambia cosnan riba bo vehiculo pa bo bay core careda por ehempel, tin varios motibo dicon bo no por core cu nan riba caminda publico mas.
Moda bayendo for di man
Segun Sr. Pieters, tabata tin un periodo cu por ehempel den bario di Dakota tabata tin varios careda cu scooter y brommer cual awor a cuminsa bira algo mas popular na Palo Marga. Algun di e problemanan cu un vehiculo cu ta wordo adapta pa core careda ta cu por ehempel, tin esnan cu ta cambia nan taira cual ta adapta pa core riba un ”race track” y por causa problema riba un caminda publico. Sin laga afo cu tin hopi cu ta haci diferente adaptacion riba nan motor y velocidad pa core careda cu ne y sinembargo despues uza e mesun vehiculo pa core riba caminda publico treciendo nan mes y otro hende varios biaha den peliger innecesario. Segun Sr. Pieters tur vehiculo cu nan topa cu ne riba caminda publico cu ta adapta pa core riba careda, nan lo takel nan. ”Na Palomarga tin caredanan entre scooternan cu ta tuma luga unda bo ta haya e personanan aki ta hinca mas cos den e motor, subi e power y velocidad di e scooter pa e careda pero despues nan ta uza e mesun vehiculonan aki riba caminda anto unabes cu bo subi e velocidad di e capacidad di bo motor, e brakenan di e scooter hunto cu varios otro cos ta cambia y e no ta apto mas pa core riba caminda pasobra bo ta hinca bo mes den un peliger.”
Brommer no ta visibel tur ora
Abo riba un scooter ,of un brommer, por wak tur cos mas facil riba caminda pero hopi hende cu ta den un auto por tarda un rato pa ripara bo. Esaki tin hopi di haber cu e diferencia di velocidad di e vehiculonan aki. Pa e motibo aki manera un persona cu ta core brommer of scooter, tin varios cos cu bo mester tene na cuenta cu ne. ”Hopi hende no por calcula e velocidad bon di con duro un brommer ta biniendo. Tin biaha nan ta wak un luz anto esaki no ta val op. Tin otro factornan cu tambe por stroba di wak, depende e orario di dia. ” Sr. Pieters ta comenta. Sin laga afo e custumber tambe cu tin awor pa wak man robes y drechi for di leu anto yega subi un crusada unda cu bo ta haya bo cu un mal calculacion di velocidad di e brommer, esakinan ta cosnan cu ta trece peliger den trafico tur ora.
”Mester purba di cuminsa custumbra no solamente e autonan pero tambe brommer, ora cu bo tin cu duna preferencia pa para completo anto no yega tuma chens,” Sr. Pieters ta bisa. Polis mes ta train hopi tur luna den e parti di e maniobra cu bo mester por sa pa evita un accident. Ta hopi importante pa bo studia y practica esakinan prome cu yega subi un brommer y bay core sin sa con pa debidamente opera e vehiculo. Sr. Pieters ta bisa cu varios biaha ta e caso cu hopi hende ta ‘freeze’ ora nan topa cu un situacion cu un otro vehiculo ta sali nan dilanti pasobra nan no por domina e vehiculo y ta accidenta mas lihe den e momento ey. Un brommer of scooter ta mas economico pero seguramente e tin su peliger dependiendo na con abo ta conduci esaki. E cosnan aki seguramente mester cuminsa tene mas cuenta cu ne y ser consciente riba e reglanan, factornan y puntonan importante pa por maneha e vehiculonan aki den un manera mas responsabel. Esaki seguramente ta pa bo mesun siguridad y di tur otro persona den trafico.
