Ayera mainta tabatin un presentacion di hobennan cu a wordo nomina pa resalta den nos comunidad na Cas di Cultura. E proyecto aki, nombra Poder di Hubentud, ta den su di tres edicion den aña 2017. Bon Dia Aruba a presenta na e evento pa haya comentario di e organisadonan y hobennan cu a participa y wordo nomina.
Jhon Freddy Montoya ta un di e personanan cu a yuda e organisacion di e evento. E ta splica cu e proyecto ta dividi den varios fase. E prome fase ta uno unda cua persona cu ta por nomina un hoben pa participa. E persona mester tin un experencia den algun disciplina cu ta practica den nan tempo liber, manera deporte, arte, trabou boluntario y mas. “Cualkier hoben cu por profila su mes como un lider y cu por mustra con hopi potencial e tin por bira un nominado.”
E di dos fase di e proyecto ta uno di screening, segun sr. Montoya. “Ta bin hunto pa evalua si berdad e hoben aki ta un persona cu a desaroya na cierto nivel y cu tin tambe mas chens pa sigui desaroya.”
Despues di esaki sr. Montoya ta splica cu Poder di Hubentud durante un periodo di 3 luna ta organisa varios tayer pa e hobennan haya e hermentnan necesario pa sigui construi a base di nan metanan y soñonan. E hobennan ta duna un presentacion na e ultimo fase unda cu ta purba crea un impacto cu nan storia a base di nan pasado, presente y futuro.
Sr. Montoya a finalisa bisando cu ‘e idea ta pa yuda forma lidernan, y pa ser conoci cu storia di hobennan ehemplar den nos comunidad’.
Lixandra Geerman, atleta
Un di e hobennan, Lixandra Geerman a wordo nomina a base di su carera como atleta den atletismo. Sra. Geerman ta practica heptathlon y ta splica cu e ta un deporte di 7 disciplina den cual ta envolvi bulamento, coremento y tiramento.
Su inspiracion pa a cuminsa cu e deporte di atletismo tabata su mayornan. “Mi mama tambe tabata practica gymnastiek y volleyball mientras mi tata a lanta den boxing y football.”
Sra. Geerman a conta cu ‘mi a cuminsa cu 6 aña y durante mi carera mi a biaha na varios paisnan den exterior pa competi. Mi a yega di bay na Bahamas y Corsou pa competencia di CAC, cual ta un pa personanan menor cu 15 aña. Na esaki mi a gana di prome luga pa Aruba’.
E hoben ta splica cu despues di esaki el a participa cu weganan di Carifta, cual ta tuma luga den Caribe.
‘Mi a wordo honra cu e nombracion di atleta di aña den 2016’, mustrando un medaya basta grandi cu un diseño di bandera di Aruba. Sra. Geerman ta duna un citaat cu ta splica su filosofia, di Usain Bolt. “There’s something special about marks. And there’s something special about names.”
Sra. Geerman ta splica: “Si boso kier hisa e nomber di boso pais y nomber na laira mester laga un marca di bo mes.”
Selena Williams, desaroyo personal
Selena Williams ta un hoben di 23 aña di edad cu a wordo nomina den categoria di desaroyo personal.
E ta splica cu su presentacion ta basa riba e palabra ‘choice’. “Mi ta sinti cu mi por relaciona e palabra aki cu tur e tayernan cu nos a tuma parti di nan. Fuera di esey e palabra aki ta un cu mi a haya na varios punto den mi bida.”
Sra. Williams ta conta cu e lo pone enfasis riba su fayonan en bes di su logronan, ya cu ‘mi ta haya cu hopi biaha nos ta wak fayo como algo cu por stop nos y no como simplemente un obstaculo cu nos por domina’.
“Semper mi a yuda comunidad, specialmente mucha chikito. Den e tempo unda mi tabata considera mi golden years mi a drenta den Parlamento Hubenil. E experiencia aki a siña mi hopi cosnan, specialmente den area di debate y public speaking.”
Segun sra. Williams, loke e ta aprecia mas di e experiencia ta cu e la siña con pa comparti su opinion y ‘mas importante con pa respeta opinion di otro personanan’. “Mi ta haya esaki di importancia grandi ya cu si nos ta respeta otro nos tur ta mas feliz.”
Presentacion emocional
Durante su presentacion, sra. Williams a recita un poema audiovisual unda cu el a expresa e manera con e tabata wordo tenta pa su manera di bisti. Den audiencia por a nota cu e hobennan a simpatisa cu su presentacion. Despues di e presentacion di e poema, e hoben a purba sigui splica su inspiracion of frustracion, pero a keda sin palabra. E audiencia e ora a afirma sra. Williams cu no mester splica nada mas, e poema a splica tur cos.
Durante su presentacion el a cambia su vestuario di uno mas masculino pa uno mas femenino. El a splica: “Mi a realisa cu e manera di bisti aki ta duna mi mas respet di e manera cu mi tabata bisti prome. E ta straño cu a pesar di esaki, mi a keda e mesun persona.”
Pa termina su presentacion sra. Williams a para dilanti un spiel y duna un monologo pa empodera su mes. Esaki a resona cu e hobennan, cual a brasa sra. Williams den grupo. Por a nota cu hopi hobennan a haya nan mes cu awa na wowo.
Reaccion di invitado
Un representante di Hal Hubenil di partido AVP, Leonaro Figaroa, ta expresa: “Hopi biaha den pueblo personanan ta pensa cu e generacionnan jong ta actua di cierto manera. E proyecto aki a mustra cu tin hopi hoben cu ta sigui nan metanan.”
“Mi mes a siña hopi awe di e dos presentacionnan cu a wordo duna. Mi ta curasha otro hobennan pa haci esaki, e ta duna publico otro perspectiva riba e bida di un hoben.”
