E plan tabata pa organisa un debate cu hobennan for di Reino, sin embargo prinses Beatrix tabata testigo di un debate nacional ayera na Universidad di Aruba. Un hobennan Arubano tabata purbando di impresiona e prinses den un tiki menos cu 1 ora.

Dos grupo a debati riba dos ponencia. E prome ponencia tabata ‘Turism has enriched our identity’. E grupo aki tabata consisti di studiantenan for di universidad mes, pero tambe di Avondhavo, EPI y International School of Aruba. Por a ripara cu e prome tanda mester a warm up ainda sin embargo e hobennan cu no tabata sa e ponencia adelanta, a haci hopi esfuerso pa debati riba nivel. Por a mira cu nan tabata uza e tipnan di e dianan di training. Un di studiantenan a pone hopi cla cu Aruba ta inverti demasiado den turismo pero ta lubida di inverti den e hobennan Arubano mes. Segun e ‘100 miyon dollar ta inverti pa turistanan aki ta haya experiencia Arubano pero cu no ta siña nos hobennan di nos pasado’. “Y prome di critica nos hobennan, corda ken a lanta nan.” Un reaccion for di e aula di universidad no a keda afo, como cu tabatin hopi mayor tambe den e sala pa wak nan yiunan debati dilanti e prinses.

Medio ambiente versus economia
E di dos rond di e debate a trece hopi mas ambiente como cu e hobennan a trece mas emocion den nan defensanan. E di dos ponencia tabata ‘introducing an environmental tax will be detrimental to our economy’. Ya durante e introduccion di e hobennan, a haci un impresion como cu un hoben a anuncia cu e lo kier bira e futuro prome minister di Aruba.

E prome hoben debatiendo tambe a laga e publico hari, indicando cu tur hende ta gusta medio ambiente un banda, pero ora ta mira e palabra ‘tax’ tur ta core. Y asina si lo introduci e impuesto, na final lo keda solamente cu boet, asina e hoben ta pone. Un reaccion fuerte tambe a bin ora un hoben a puntra e sala ki garantia tin cu gobierno realmente lo inverti e placa for di e impuesto nobo den medio ambiente.

Despues di e debate ambos grupo di hoben a bay riba potret hunto cu prinses Beatrix pa despues atende un brindis cu ne den e cura di universidad. Awe mainta prinses Beatrix lo bishita Bubali Plas y lo habri Spaans Lagoen como parke proteha oficial. Atardi e lo atende un seminario na e centro di bishitante di Arikok.