Hobennan Hulandes ta ser acusa den 67 caso di hincamento den 2022 incluyendo 10 caso fatal

(NLTimes) – Violencia cu cuchiu entre hobennan ta den aumento na Hulanda, segun analisis conduci pa ANP. Cuerpo policial a acusa e grupo di hobennan di mas o menos 70 caso di stacamento cu a tuma luga den aña 2022, marcando e cantidad mas halto den añanan recien.

10 persona a fayece di e incidentenan aki, cual ta mas cu aña 2020 y 2021 combina. Empleadonan den cuido di hobennan anteriormente a publica advertencianan tocante hobennan y e hecho cu cada biaha mas y mas ta ser haya cu arma den nan posesion.

Cuerpo policial a reporta 67 caso di stacamento cu hobennan como e sospechosonan aña pasa. E caso final conoci na 2022 a tuma luga na Bladel, Noord-Brabant durante celebracionnan di Aña Nobo unda un hoben di 18 aña a ser fatalmente herida. E residente di e municipalidad, ken tambe tabatin 18 aña di edad a ser aresta pa e crimen sinembargo te ainda no ta conoce e motibo dicon el a comete e crimen aki. Na fin di october, un hoben di 14 aña a fayece pa motibo cu el a ser staca fatalmente na scol den Hoorn, marcando un incidente cu a impacta e residentenan di e area y a resulta den e aresto di un hoben di 16 aña. Otro stacamentonan fatal a tuma luga den aña 2022 na Middelburg, Amsterdam, Horst, Rosmalen, Breda, Vlaardingen, Vlissingen y nijmegen.

Den henter aña 2021, segun reportahenan di cuerpo policial, e hobennan tabata involucra den casi 50 caso di stacamento. 3 di esakinan tabatin consecuencia fatal. Un hoben di 17 aña a ser asesina den un atake na Den Haag. Amistadnan di e victima aparentemnente a staca e hoben di 14 aña na un otro localidad na Den Haag prome, pa cual su amigonan tabata kier a tuma vengansa. Den Rozeenburg, un bario den e municipalidad di rotterdam, un hoben di 17 aña aparentemente a staca fatalmente un otro hoben di 21 aña, y na Rijswijk un persona di 26 aña a ser hinca cu cuchiu pa un hoben di 16 aña causando su morto.

E figuranan aki ta basa riba reportahenan for di cuerpo policial den cual e edad di e sospechosonan a keda menciona of den cual cuerpo policial ta explicitamente declara cu e sospechosonan ta un hoben, menor di edad, mucha homber of mucha muhe. Ora cu cuerpo policial no ta aclaria esaki, e incidente no ta ser considera ni inclui den e lista. E reviso tampoco no ta inclui si Ministerio Publico a procesa e sospechoso of no, of si un sospechoso a ser sentencia of libera di cualkier acusacion. Como resultado di esaki, tin necesidad di mas data pa por saca un conclusion y cifra final concreto.