“Hobennan hopi preocupa cu situacion actual di enseñansa”

Diamars anochi a tuma luga un encuentro entre Lider di plataforma politico Otmar Oduber cu hobennan. E anochi a encera hopi intercambio di pensamento y informacion di parti di sr. Oduber pero mas ainda di parti tur e hobennan presente cu a mustra nan preocupacion pa diferente situacion actual den e aspecto di salubridad, husticia, enseñansa y ‘social media’ entre otro. Si mester enfoca un rato riba locual cu segun e hobennan falta hopi mehoracion ainda ta riba tereno di enseñansa, particularmente e limitacionnan cu tin.

E grupo di hobennan tabata hopi varia, esta tin esunnan cu ya no ta bay scol mas y ta traha, otronan ta traha y bay scol y esunnan cu ta full-time na scol. Diferente di e hobennan a splica cu e sistema actual ta limita nan pa continua cu nan soñonan of ta haci hopi dificil (caminda demasiado largo) pa finalisa un estudio halto si nan ta actualmente na EPB por ehempel.

Tabatin un hoben cu a trece pa dilanti e retonan cu ya caba e sa cu e lo tin cu enfrenta si e no haci su best ora e ta hoben pa caba scol. Mustrando cu un “problem child” awe kisas mañan ta bira un hoben madura cu tin e gana di siña y haci algo cu su bida. Sinembargo e ta wordo limita door cu tempo e tabata mas jong e no a haci su best na scol. Un hoben cu ta bay EPB actualmente y a druip no tin e opcion pa keda purba te ora cu e logra, e ta wordo kita for di e scol si e yega un cierto edad. Asina tambe tin retonan di cuido medico y e servicio cu AZV ta brinda cu tambe ta preocupacionnan cu hobennan tambe ta experiencia directamente y indirectamente. ‘Kico ta pasa cu e placa cu nos ta contribui cu e tur luna’, ta un di e preguntanan cu a surgi. Hobennan kier claridad riba esaki.

Pa loke ta e topico di politica sr. Oduber a puntra kico hobennan ta haci pa informa nan mes riba politica y si tin interes pa esaki. Prome cos cu nan a bisa ta cu ta riba Facebook nan ta mira un tiki di tur cos incluyendo politica, cual nan no ta duna mucho atencion mirando cu el a bira manera un wega. Sr. Oduber a keda masha contento cu tur feedback y lo analisa e diferente puntonan treci pa dilanti pa asina yega na un plan di gobernacion definitivo cu lo wordo treci dilanti otro luna.