E profiel di hobennan cu ta cay cera mayoria di nan tin entre 15 pa 16 aña y mayoria di nan ta mucha homber. Hobi biaha nan ta hobennan cu no ta bayendo scol, nan ta consumi droga, nan no tin pasatempo positivo, ya cu nan no tin nada constructivo di haci. Tambe nan ta hobennan cu nan nucleo familiar ta instabil. Nan nivel di estudio ta hopi abou…
Director di fundacion Reclassering, Sra. Seraida Pemberton a declara na Bon Dia Aruba cu tur e combinacionnan di e diferente factornan ey ta haci cu e hobennan ta bira mas vulnerabel. Y si nan no tin un bon netwerk rond di dje, esaki ta pone cu e hoben ta bira instabil y desekilibra y bay den mal caminda.
Problema multi facetico
Aunke e ta indica cu no por duna un motibo claro pa kico un hoben ta cay cera. Ya cu nan tin motibonan varia ya cu cada hoben tin un factor cu ta hunga un rol cu e ta bay cera. Pero locual Reclassering ta bin ripara cu e factor di cada hoben ta bira mas. El splica cu bou un hoben tin diferente factor crimanologico cu ta haci mas dificil pa atende cu e problema di criminalidad hubenil.
“Ya cu bo tin un hoben cu tin un asina multi facetico problema cu guia ambulante no ta yega”, el a declara na e matutino aki. Pero actualmente e fundacion aki tin limitacion financiero y nan ta corto den personal pa duna guia den grupo y individual na menor di edad y hoben entre 11 pa 17 aña cu a confronta problema cu husticia. “Masha poco bo por haci”, el a laga sa.
E clientenan di Reclassering ta guia obligatorio nan mester haya. Pero tin biaha nan no ta presenta na oficina y esaki ta demanda e presencia di mas personal pa nan por bay afo pa bishita nan clientenan den nan cas.
“Pero si bo no tin e personal pa haci esey, e ayudo ta keda limita”, el a expresa cu sumo preocupacion. Y precisamente e grupo di hoben cu ta cay cera bek ta e hobennan recidivista cu e ayudo cu Reclassering ta brinda nan no ta suficiente pa motibo di nan limitacion financiero y di personal.
