Un grupo di mas o menos 20 hoben Arubiano, tanto studiante como profesional a uni hunto y ta den preparacion pa lansa e plataforma digital titula “Fuente” riba dia 15 di december binidero. Daniella Arends, ta conta Bon Dia Aruba algun detaye interesante di e plataforma aki.
Arends kende ta studiando actualmente na Hulanda ta conta cu rond di luna di mei el a pone riba Facebook cu e kier a haci un debate informativo cu algun profesional di Aruba. “Mi tabata lesa asina tanto cos riba Facebook pero nunca mi tabata sa unda mi por haya echonan. Ora mi a puntra ken kier yudami organisa un debate, Lorenzo Frankel a mandami un mensahe y a sugeri pa nos cuminsa un grupo na Hulanda. pa asina discuti con nos por contribui na Aruba. “ E hoben ta remarca.
Diversidad y calidad
E grupo tras di Fuente ta uno hopi diverso, nan tur diferente background y estudio.
Pues nan a pensa cu esey ta un ventaha. Arends ta subraya cu na comienso e tabata duro pa yega na un acuerdo mirando cu nan ta hopi hende. “Na final e idea a keda mescos, locual nos kier ta mas transparencia y nos kier un plataforma unda tur hende por contribui.E grupo ta keda crece y nos ta conta cu contribuidornan tanto na Aruba como Hulanda.”
Segun Arends, un di retonan mas grandi cu nan ta mira pa Fuente, ta pa por mantene e calidad di e contenido uno halto. E hoben ta bisa “Mi ta haya na Aruba ta dificil pa haya informacion pa skirbi un articulo a base di hechonan, paso hopi biaha bo mester haya bo informacion via entrevista cu ta haci e dificil pa “fact-check” e informacion. Esey ta un di e retonan cu ami ta enfrenta awo skirbiendo mi serie di articulonan”
Fuente den sociedad
Kico ta Fuente precisamente? E hobennan ta pronostica cu el lo bira un plataforma unda ideanan di con pa mehora nos sociedad lo wordo comparti y discusionnan sano ta tuma luga. Tur hende ta bon bini pa aporta.Y cada ken ta haci uzo di su expertisio pa mira con e por trece cambio sea ta grandi of chikito, Arends a splica. Por ehempel, esun cu a studia ley por busca manera di investiga e ley di abuso di mucha na Aruba y con por traha pa mehora esaki.
Fuera di esey Fuente no lo afilia su mes cu ningun partido politico y lo kier tene discusionnan basa riba e hechonan y no opininan. Tambe studiantenan cu pa nan thesis a investiga algun topico enfoca riba bienestar di Aruba, por haci uzo di e plataforma pa comparti esaki.
Fuente lo lansa riba e website www.nosfuente.org
