Recientemente Fraccion di MFK a ricibi bishita di e hoben yiu di Corsou, Suwentley Concinion. Ta trata di un hoben yiu di Corsou di apenas 28 aña di edad, cu pa luna di december proximo lo termina su estudio como Capitan di barco (tanker cu un capacidad di 4 mil 193 ton).
Suwentley Concincion a splica Fraccion di MFK cu aki na Corsou el a bishita primeramente Prinses Margriet pa despues el a bishita St. Antoniusschool na Sta. Maria. Despues el a bishita Stellamaris College. Despues di a termina su VSBO, el a bay Hulanda, caminda el a drenta servicio obligatorio.
Despues buscando trabou e tabatin un amigo cu tabata traha riba barco, cu a acerca e compania pa cual e tabata traha, p’asina Suwentley por a haya un oportunidad di trabou. El a cuminsa como “deksman”, pa despues sigui e estudio di matros. Un estudio cu un duracion di dos aña, pero cual el a logra termina den apenas 3 luna. El a traha como matros, pa despues sigui e estudio di “Stuurman”.
Mirando su entusiasmo, e empresa “Unibarge” a tuma Suwentley Concepcion den servicio permanente y a ofrece e posibilidad pa haci e studio como “2de Kapitein” y despues como “Kapitein”. Suwentley a tuma e oportunidad aki y un estudio cual tin un duracion di seis aña, e ta terminando den cuater aña den luna di december proximo. Cu realisacion dje estudio aki, e hoben yiu di Corsou Suwentley Concepcion lo por core barconan (tanker) di 110 meter largo, 11.5 meter hancho, cu un capacidad di 4 mil 193 ton.
Suwentley Concincion su soño ta pa den futuro, duna hobennan yiu di Corsou e oportunidad pa por forma nan mes den e mundo naviero. Despues di termina e estudio di Capitan, Suwentley lo kier continua cu un estudio di seis luna cu cual e lo obtene e licencia pa por tin su propio barco y nabega barconan di cualkier tamaño y den cualkier teritorio y sin limite di tonelada.
Suwentley Concincion a splica Fraccion di MFK cu den futuro e lo kier regresa Corsou cu su propio barco, p’asina brinda hobennan yiu di Corsou oportunidad di formacion y trabou den e mundo naviero.
Fraccion di MFK a haci un obsekio na Suwentley Concincion y ta spera cu pronto e lo por ta bek na Corsou pa realisacion di su soño, pero principalmente crea oportunidad di formacion y trabou pa hobennan local.
