Un hoben di 16 aña di edad y un señora den su edad di pension por bolbe cana y move rond libremente danki na un implante imprimi den 3D desaroya pa Utrecht su centro medico di universidad UMC.
E tratamento, cual ta consisti di un implante di titanium diseña specificamente pa e persona individual, tabata desaroya pa un ekipo di ingeniero, ciruhano y cientifico. Ademas el a ricibi atencion amplio den un publicacion cientifico den e journal medico prestigioso The Lancet e siman aki. ‘Awo nos tin un blueprint riba cual otro hospitalnan lo por ofrece e tratamento’, asina medico y experto den 3D printing Koen Willemsen a bisa. Pa Rick Duwel, kende tin neurofibromatosis, cual ta crea instabilidad den su columna, e operacion tabata su ultimo speransa.
Su columna a collapse y e implante tabata e unico manera cu lo por a evita paralisis completo den termino largo. ‘Loke nos a inventa ta un apoyo pa columna imprimi den 3D cu titanium, cual nos a test extensamente. Nos mester a haya sa tambe tocante e regla y regulacionnan regardando e tipo di implantenan aki. Henter e proceso a tarda 6 luna,’ Willemsen a bisa. Obstaculonan legal sa stop hospitalnan di uza e tecnica aki, pero awo cu mayoria problema ta hala un banda y tin un blueprint traha pe, e lo por bira algo mas comun, segun Willemsen.
Actualmente e tratamento ta destina pa personanan cu malesanan poco comun manera neurofibromatosis y e malesa masha raro cual ta causa weso pa desintegra, cual e señora tin. Sinembargo Willemsen no ta descarta cu den futuro implantenan traha cu tecnologia di 3D printing lo bira e miho opcion pa un gran cantidad di malesanan. Duwel a bisa cu e ta orguyoso di ta e prome persona cu ta ekipa cu un implante di titanium imprimi den 3D, aunke ‘dal koppenrol absolutamente no ta un opcion’, el a conta Volkskrant.
