Siman a habri cu e noticia di un otro hoben (27) cu a fayece. E biaha aki ta relaciona cu un condicion medico cu e hoben lo tabata tin pero no lo tabata na altura di esaki. Ta trata di e hoben masculino di inicialnan W.d.R. kende ta conoci den comunidad, specificamente den e area politico y alabes den e mundo di real estate.
Segun director di medio di comunicacion Solo di Pueblo, Edmond Croes a declara riba su pagina di Facebook, e hoben lo a acudi 4 biaha na hospital pero a wordo manda cas bek na varios ocasion. E situacion a empeora pa cual e hoben a keda interna diadomingo anochi. Sr. Croes ta sigui bisa den un siguiente comentario cu el a presenta na hospital y a acudi cerca e famia.
“Mi a acudi cerca e famia di Wouter na hospital, y por a mira Wouter ainda den su soño profundo. El a acudi 4 bes na eerste hulp cu hopi dolor di cabes den e ultimo siman aki y nan a mand’e cas cu paracetamol. 4 bes! Ayera nochi nan a tene na hospital ora ya el a cay den otro y perde balans. MRI no ta traha. Ayera nochi Wouter a drenta den coma y awe mainta ora a pasa e test a descubri cu e tabatin un tumor.”
Durante dia di awe, Bon Dia Aruba lo tuma contacto cu instancianan concerni pa mas informacion.
