Ayera mainta a tuma luga un actividad di Arubaans Padvinsters Gilde, como parti di World Association of Girl Guides and Girl Scouts a duna presentacionnan conhuntamente cu Parke Arikok riba diferente aspecto relaciona cu importancia di conserva y proteha naturalesa. Gobernador Alfonso Boekhoudt tambe tabata presente y te hasta a hiba algun palabra dilanti pa e grupo di hobencitanan scout.

Durante e evento a enfoca entre otro riba un acontecimento cu a haya basta atencion aña pasa: e ley cu a wordo aproba den parlamento aña pasa pa prohibi e uzo di saco di plastic den supermercado y otro establecimentonan. Un di e personanan cu a bin cu e iniciativa aki, Juliet Carvalhal kende ta cabando su bachelor na Universidad di Aruba e aña aki a duna un presentacion na e hobencitanan tocante e implementacion di e ley y e consecuencia pa e cambio den mentalidad cu e ley ta simbolisa.

E prohibicion di e saconan di plastic tabata ataca e problema di uzo di plastic di dos banda: tanto como di banda di comercio como banda di consumido. Sra. Carvalhal a subraya e importancia di un ley di e tipo aki pa nos medio ambiente mirando cu niun di e plastic cu ta wordo importa na nos isla ta wordo recicla of wordo uza di otro manera cu ta evita cu esaki ta bay den lama of mondi.

Bay mas leu cu djis saco di plastic

Pero mas aleu sra. Carvalhal a ilustra cu e ley aki ta un manera con ta purbando pa haci cambionan grandi den manera di pensa di nos sociedad, unda ‘nos tin cu cuminsa pensa conscientemente ta kico ta pasa cu e plastic cu nos ta tira afo den bari despues cu esaki wordo hiba pa trucknan’. P’esey sra. Carvalhal ta spera cu hunto cu e campañanan di ‘Mi tas ta reuzabel’ comunidad en general ta pensando mas leu riba e productonan cu ta wordo destina pa un solo uzo.

E iniciativa aki alabes ta un prome stap pa tambe bay den direccion di stop otro tipo di plastic di wordo importa, manera boternan di plastic, take-out box, tayo, cupnan y forki. Pero e manera cu a implementa esaki a tene cuenta cu e cambionan ta algo cu ta drastico y ta tuma poco tempo pa por bira parti di consenshi di pueblo. Sra. Carvalhal a duna ehempel cu ‘saco di plastic tin un compania so ta traha nan akinan. Pero si mira boter di plastic nos tin un compania grandi cu ta haci uzo di esaki’. Pues sra. Carvalhal cu e medidanan pa cambia e manera cu nos ta anda cu e productonan traha di plastic mester tene cuenta cu sociedad, consumido y tambe comercio. “Nos tur lo mester traha hunto pa defende nos naturalesa”. Den mesun spirito ta combersando cu city inspector pa yuda den e chekeo riba e implementacion di e ley aki cu ta cay bou ordenansa di polis general (Algemene politieverordening). Pero te cu e canalnan aki no wordo defini por bay meld localidad cu ta uza plastic via pagina di Facebook di ‘Mi tas ta reuzabel’. ‘Lo duna espacio tambe pa e luganan haci cambio’, sra. Carvalhal a splica mirando cu den cuadro di ley por bin boet te cantidad di 10 mil florin.

Acerca luga cu ta uza plastic pa cuestiona uzo
Un di e pasonan cu sra. Carvalhal ta urgi comunidad pa tuma ta pa cuestiona cierto supermercado of restaurant riba uzo di productonan di plastic. “E ta poco dificil pa acerca un comerciante cu e topico aki, pero mi ta kere si nos como comunidad tuma accion nos lo mira e resultadonan cu nos kier.” Sra. Carvalhal a duna ehempel na e hobennan di vocifera na un supermercado cu si no tuma stap pa stop uzo di plastic, lo no cumpra mas na e supermercado aki.

Adrienne Tromp, un hoben kende tin par di aña den scouting a conta di su banda cu e charla cu sra. Carvalhal a duna tabata un di e puntonan cu a hala su atencion, particularmente pa e manera con a subraya e uzo di plastic den bida diario. Por ehempel por medio di mustra cu tambe bebe di straw ta nifica un impacto pa nos naturalesa.

Un otro scout di 13 aña di edad, Asher Kock, a conta di su banda cu e echo cu tin cantidad grandi di plastic cu ta wordo importa a ‘pone mi pensa’. Pa e rason aki sra. Kock lo percura pa tene atencion special pa uza plastic lo menos cu ta posibel.

‘Naturalesa no ta di nos pero si nos responsabilidad’

Durante e evento gobernador Alfonso Boekhoudt tambe tabata presente y te hasta a hiba un discurso cortico dilanti pa e hobencitanan di scouting. Gobernador a splica cu el a dicidi di presenta pa e iniciativa aki mirando ‘mi stimacion grandi pa lama’, citando e manera con algun persona ta corda con sr. Boekhoudt tabata traha na waf un tempo.

“Tur loke nos importa na plastic ta wordo tira den lama eventualmente, cual ta un cantidad di 13 biyon kilo. Esaki ta mescos cu si nos lo tira un truck di plastic den lama cada minuut. Tin bon desaroyo manera e ley iniciativa cu boso a haya un splicacion riba dje awe, pero nos tur mester carga un responsabilidad pasobra naturalesa no ta di nos, pero si ta nos responsabilidad pa cuid’e.”