Un hoben a logra salba su bida den e accidente di un bus na Peru, den cual a muri 48 persona diamars pasa. Esaki danki na su increibel reaccion y rapidez di refleho. Máximo Jiménez Vilcayaure, di 24 aña, a termina hospitalisa cu apenas algun golpi na su curpa y un brasa fractura.
E hecho, cu e medionan Peruano a califica di “un milagro memey di e tragedia” tin un splicacion logico: segun e director di e Hospital di Chancay, Víctor Virú, Jiménez Vilcayaure a bula for di bentana di e bus algun seconde prome cu el a bolter y a cay den un abismo di 250 metro na Pasamayo. Di acuerdo cu e noticiero 24 ora, Jimenez hasta por a yega na e hospital pa su mes esfuerso, cu un taxi. E hoben, cu na e momento aki no kier papia cu ningun hende, ta stabiel pero den observacion pa descarta un trauma celebral.
Jiménez ta un di seis sobreviviente di e tragedia, di cula varios tin multiple fractura y cu a wordo traslada pa dos hospital di Callao, asina e vice comandante general di Cuerpo General di Bombero Boluntario di Peru, Larry Linch, a confirma.
E luga unda e bus a cay, despues di un choke cu un truck, ta conoci como La Curva del Diablo na costa Pacifico Peruano, como 45 kilometro nort di Lima. Pa motibo di scuridad e socoristanan mester a para nan trabao di rescate, ,tambe pasobra marea halto a yega na cubri parti di e bus.
Inicialmente polis a informa di 25 victima fatal, pero despues a informa di 36 pa despues finalmente duna cuenta di 48 victima mortal. Despues di e accidente, un helicopter di polis a baha e socoristanan na e luga unda e bus tabata, mientras otronan a baha cu ayudo di cabuya.
Marina di Guera Peruano a manda un lancha di patruya pa colabora cu e socoristanan den e zona di accidente, cu a sucede pa 11:43 di mainta, ora local.
“Ta hopi doloroso pa nos como pais sufri un accidente di e magnitud aki. Mi solidaridad profundo cu e dolor di e familiarnan”, presidente Peruano Pedro Pablo Kuczynski a skirbi riba Twitter.
