Siman pasa Marinierskazerne tabatin un entrega di certificado pa personal di Cuerpo Especial Arubano (CEA) en conexion cu nan training pa uzo di arma di candela y tambe procedura di detencion. Un miembro femenino di e cuerpo ta conta su experiencia.
Desde un tempo caba Marinierskazerne na Savaneta tin bista pa traha mas relacion extenso cu e institutonan di siguridad di pais Aruba. E iniciativa pa traha hunto cu CEA pa duna un training na trahadonan na KIA ta bin for di e punto di bista aki. Asina por mira cu mas ta purba trece cuerponan manera Cuerpo Policial y Cuerpo di Bombero, mescos cu Aduana y Kustwacht paden di muraya di Marinierskazerne pa mas training.
Un di e personanan cu Marinierskazerne ta gradici pa su esfuerso y trabou pa por pusha e proyecto aki en conhunto cu CEA, Kazerne y Defensie Bewaking – en Beveiligingsorganisatie ta docente di IBT korporaal Tromp, un hoben cu su raiz den Arumil kende a haya chens pa haci un estudio pa bira un docente di IBT na academia di polis na Hulanda. Korporaal Tromp a splica Bon Dia cu ora un colega di dje di Arumil a sigui bay den CEA a papia riba e estudio cu el a caba na Hulanda y asina tambe con e lo por yuda CEA mehora e conocemento y training bou cuerpo di CEA.
Un di e cursistanan cu a haya su diploma ta Jurayma Eduards, kende alabes ta un di e personanan femenino den un cuerpo consistiendo mi mayormente hende homber Ta haya cu e training aki ta uno importante pa e cuerpo tambe por proteha nan mes miho. ‘Particularmente pa nos hende muhe pasobra pariba tin hopi hende homber’, sra. Eduards a conta Bon Dia.
Sra. Eduards a bay mas leu ainda y a recomenda hende muhe, no obstante di unda nan ta bin of kico nan situacion ta, pa inverti den cursonan di self-defense. “E ta importante pasobra mundo awo a bira hopi krap y como hende muhe bo mester defende bo mes, te hasta si ta na cas mes, di bo casa. Mi mes a caba di pasa un curso di security agent na Enseñansa pa Empleo prome cu esaki y mi ta kere nunca ta laat pa bo sigui siña y mehora bo mes.”
