ORANJESTAD – Sandra Florez a declara na Bon Dia Aruba cu el a bira victima di maltrato fisico di un hoben cu tin apenas 4 luna bibando na Aruba, y kende ta hunga den un team di futbol profesional local. Su problema ta cu e hoben ainda ta liber. Di banda di e acusado, nos no a logra di haya un comentario.
E incidente di mal trato a sosode dia 29 di september ultimo prome cu merdia na altura di Papaya. A pesar cu e keho a wordo entrega na polis cu a traha un proces-verbaal, e hoben aki ainda ta liber, sra. Florez ta expresa. El a mustra na e matutino aki un copia di e proces-verbaal cu polis a traha di e denuncia aki.
Ayera mainta Bon Dia Aruba a tuma contacto cu G.R. kende ta tata di e hoben futbolista, J.D. R. pa tende nan banda di medaya relaciona cu e caso di maltrato aki. Nan a keda di bin ayera pa 12or y mey merdia na oficina di Bon Dia Aruba pa duna nan version, pero nan no a presenta. Nos a insisti varios biaha pa tuma contacto cu nan via telefon, pero nan no a reacciona. Pa tal motibo Bon Dia Aruba ta publica e version di sra. Florez so.
Agresion fisico
Sra. Florez a laga sa cu e hoben di 22 aña ta su agresor. El a conta cu e futbolista aki a dal e un mokete na su cara algun dia pasa. “Mi a wordo agredi brutalmente ora mi a interveni pa para e futbolista di maltrata su tata verbalmente.” Ainda su cara ta blousa, y dokter a dun’e AO te diamars otro siman.
El a skirbi un remitido caminda e ta relata cu e hoben futbolista a dal e den presencia di su yiunan. Nan tabata cinco hende cu tabata keiro den un van. Tambe e tata di e hoben kende tabata den e vehiculo y a baha su yiu di auto mesora, despues di e incidente.
Polis no por a yuda
E ta indigna ya cu el a entrega keho na polis di Shaba, unabes cu el a wordo maltrata, y ainda nada a wordo haci. Ora cu el a yega pa haci e denuncia aki, polis no por a haci mucho cos debi cu tur recherchenan tabata riba caya relaciona cu e mal tempo y debi na e falta di reporte medico. Awor e situacion a normalisa y nan a haya e rapport medico, y ainda su agresor ta liber, cual e no ta compronde.
E victima ta haya tambe cu no ta un bon ehempel pa hubentud ni deporte, teniendo na cuenta tambe cu un ekipo di futbol local a firma pa e agresor aki por biba na Aruba y hunga pa nan.
E ta masha indigna tambe pasobra su agresor a expresa cu e ta contento cu su cara ta tur hincha, y ta desea lo pio p’e. Tur esaki ta graba, sra. Florez ta bisa.
Sra. Sandra Florez ta pidi husticia pa defende e victimanan di violencia, specialmente hende muhe. E ta haya cu husticia mester actua rapido pa protege e victimanan di maltrato, locual no a sucede den su caso ainda.
