Hoben futbolista Fabio Montilla a cumpli su soño di hunga den e Real Madrid Foundation World Challenge Tournament 2023

For di aña pasa e hoben futbolista Fabio Alexander Montilla tabata prepara su mes pa biaha pa Madrid, Spaña, pa hunga den e Real Madrid Foundation World Challenge Tournament 2023. For di 31 di maart pa 8 di april Fabio tabata na Real Madrid Sport City pa hunga den e torneo aki y den un entrevista e ta conta con e experiencia inolvidabel aki tabata.  

Aña pasa Fabio a ricibi invitacion di parti di Fundacion Real Madrid pa hunga den e torneo despues di a participa den e clinica di futbol cu e fundacion a organisa na Aruba. Un soño di dje cu a wordo cumpli.

“Mi a pasa hopi bon. E futbol ayanan ta bon, mi team tabata basta bon; pero nan tabata chikito y e muchanan ayanan ta halto, nan tin forsa y ya cu e muchanan ta chikito, e muchanan grandi tabata pusha nan un banda. Pero mi ta kere cu si nos hunga cu muchanan di nos haltura, nos lo a yega mas leu,” el a conta di su experiencia.

E team di Fabio a keda na di cuater luga y algo hopi emocionante p’e, tabata cu el a wordo eligi como capitan di su team. El a sigui conta cu nan a hunga bon y cu tur mucha a haci nan maximo esfuerso durante e torneo.

“Nos a hunga bon, nos a hunga cu forsa, nos a hunga cu pasion, nos a hunga cu actitud, cu curason. Mi a defende mi best y tur mucha a haci nan best,” el a bisa.

Fabio ta hunga e posicion di defensa y durante e torneo el a anota dos gol, algo cu a hacie hopi contento y mas ainda ya cu e ta un defensa. El a conta cu e tabata contento tambe pasobra el a haya hopi bon comentario di diferente hende y e coachnan na Spaña. “Tur hende a gusta con mi a hunga. Spera mi bay mas ayanan.”

Claudia Merino, mama di Fabio, a biaha cune y e tambe a conta Bon Dia Aruba con e torneo a bay y con e experiencia aki tabata. “Ami ta haya e tabata un experiencia hopi bunita pa e muchanan, nan tabatin e oportunidad di comparti cu muchanan di diferente pais na unda cada un tin nan manera di hunga,” el a indica.

Merino a remarca cu e no tabata facil pa e muchanan, ya cu e tabata algo totalmente diferente y na mesun momento dificil pasobra ningun di e muchanan cu a hunga den e team cu Fabio tabata conoce otro y nan mester a adapta nan mes pa por a sali riba veld pa hunga. Pero a pesar di e tempo cortico pa train cu otro e ta contento cu e resultado y e desempeño di su yiu.

“Di berdad pa nan mi ta kere cu nan nunca lo lubida e experiencia aki pasobra nunca nan a imagina cu nan lo ta den un torneo internacional organisa pa e Fundacion di Real Madrid. Di berdad e tabata algo hopi bunita y mi ta hopi contento cu Fabio a haya e oportunidad aki,” el a finalisa.