Diasabra ultimo, Paseo Herencia tabata tin e honor di devela riba un Wall of Rising Stars un otro hoben talentoso mas cu ta Ethan Westera.

Ethan Westera, 19, a nace na Aruba anto a cuminsa haci e deporte di Windsurfing na edad di 7 aña. Na 2008 el a haya e oportunidad pa participa na Aruba HI-Winds anto a logra e titulo di tercer luga Slalom bou di 12 aña. Minister di Salud Publico, Cuido di Nos Grandinan y Deporte, Dr. Carlos “Alex” Schwengle tambe a duna un discurso y felicita Ethan.

 Gana mas cu 30 titulo
Na e mes un aña aki Ethan a logra competi den Circuit Brasileiro unda cu el a gana e titulo maximo di prome luga den categoria di 12 aña bay abou. Esaki tabata dijs e comienso di un pasion pa e sport di Windsurfing. Na 2016 Ethan Westera a gana e titulo di PWA Youth Slalom World Champion y e aña aki el a gana IFCA Elite Slalom World Champion. Ta di admira cu Ethan Westera su dedicacion na su deporte a lag’e gana mas cu 30 titulo desde cu el a cuminsa practica su deporte.

Windsurfing tabata un hobby
Diasabra den presencia di famia y amigonan, Valerie Pietersz General Manager a yama e publico presente un bon bini y a splica con a yega na pone Ethan Westera riba Paseo Herencia su Wall of Rising Stars. Mama di Ethan Westera, Samantha Westera, a cuminsa conta con windsurfing a cuminsa como un hobby y poco, poco bira un deporte cu Ethan Westera kier a bira un professional aden. Durante e ceremonia tambe a entrega e premio di e “Challenge Cup” na Carmen Geelkens. Tur aña ta entrega e “Challenge Cup” na e atleta local cu a mehora mas den su deporte. Minister Swengle a invita tur hende pa bay na e Wall of Rising Stars y asina a devela Ethan su potret.

Representa Aruba
Recientemente Ethan a bira campeon mundial nobo di Slalom Windsurfen. Bon Dia a tuma contacto cu e hoben pa su reaccion anto cu hopi entusiasmo el a contesta: “Mi ta sinti hopi felis cu mi a logra di gana un campeonato mundial. Mi tabata sa cu mi por a haci hopi bon, pero nunca mi a pensa cu mi lo gana un campeonato asina cu e edad cu mi tin awo.” E hoben ta conta nos cu e ta train henter e aña pa e por ta fit y prepara pa tur evento cu e participa den dje. E ta conta nos cu e kier keda competi den e PWA World Tour e aña aki. Ethan: “Mi a haña bon resultadonan di esey, anto claro mi kier keda representa Aruba lo maximo cu mi por.”