ORANJESTAD— Hoben Nicole Villada, docente na St. Franciscus College den apenas 2 aña merecidamente a gana e Appel di Oro di 2019 pa miho maestra. Su formula pa exito ta encera semper ta disponibel pa mayornan, dunando mas di loke ta spera di dje, acomoda mucha cu tin dificultad cu idioma y uza tecnologia y medio social.

‘Pa mi e miho escogencia tabata keda na Aruba’
Ora nos wak cu dia pa dia mas studiante cu ta caba educacion secundario na Aruba ta dicidi pa sigui studia den exterior, asina contribuyendo na e fenomeno di brain drain, ta interesante pa para keto y pensa kico ta e motibonan pa keda, ora tin asina hopi pa bay. Den entrevista cu Nicole Villada, e ta conta Bon Dia cu el a dicidi di duna Aruba un chens ‘mirando cu asina hopi hende ta papia malo di nos pida baranca’.

“Mi a haya hopi comentario negativo, puntrando dicon mi no kier progresa mas ainda den exterior, mirando cu oportunidad na Aruba ta limita. Pero cu 23 aña mi por bisa cu mi a caba un carera academico y tin ya 2 aña eherciendo un trabou cu mi stima. Pa mi e miho escogencia tabata keda Aruba.”

Ademas, Villada no ta haya cu tampoco bo mester stagna na Aruba, pues e lo ta buscando pa sigui studia mas ainda. E ta wardando pa e estudio di Papiamento na IPA sigui pasobra ‘ya tin tempo ta bisando cu lo bin bek cu e programa’, den atardi pa asina e lo por sigui traha y desaroya su carera academico.

Reflehando riba su situacion actual, e ta pensa cu nunca lo e tabata kere tempo di Mavo na La Salle, of prome cu esaki hasta tempo cu el a bay e mesun St. Franciscus College, cu e lo yega asina leu y hasta bay duna les na e mesun scol cu el a bay como mucha. “Mi tabatin un momento ora di caba Mavo unda mi mentor a conseha mi mayornan pa no bay Colegio pasobra e tabata pensa cu mi no lo logra sigui. Pero aworaki tin biaha mi ta cumind’e y mi ta puntr’e con bay, colega? E ta un hopi bon docente, pero cu esaki mi kier mustra cu semper ora bo ta pensa cu bo no por, si bo purba bo lo sorprende bo mes.”

Comunicacion cu medio digital entre mayor y docente
Pero con Villada, un hoben cu apenas 2 aña den su carera como docente a ricibi un reconocemento pa su trabou den tiki tempo?

Aki ta unda esfuerso ta conta, pasobra e ta mantene mayornan di su muchanan na altura di tur e huiswerk cu tin por medio di un group chat riba WhatsApp. Esaki ta haci cu mayornan ta sinti nan mes cu asina hopi confiansa cune como docente, ‘cu te hasta anochi si tin problema cu huiswerk mayor ta yama mi pa please yuda, cual semper mi ta dispuesto pa haci’.

E no ta stop te aki, pasobra Villada ta percura pa e mayor sinti su mes comodo cune como docente hoben. “Mi por compronde cu tin mayor ora nan wak mi na cuminsamento di aña no ta sinti 100 porciento sigur den mi habilidadnan pasobra nan no ta custuma di wak docente jong. Loke mi ta haci ta bay live durante les riba mi pagina di Facebook pa asina mayor por wak cu nan yiunan ta hayando e atencion debido y cu e les ta bay manera cu mester ta.”

Ya caba implementando un sistema di enseñansa multilingual
Mirando cu durante transcurso di tempo e aulanan ta birando mas internacional, e ta haya su mes ta traduci hopi huiswerk y otro material na Spaño, Ingles of Hulandes, mirando cu tin mas mucha cu ta bin di mayornan Latino, Asiatico of Hulandes. Villada mes como yiu di pariente Colombiano ta purba su best pa yuda tur muchanan no obstante di unda nan bini.

“Mi ta duna les na mucha di eerste y tur e material den klas mes ta den Hulandes. Esaki ta haci cu mayoria di e mayornan cu ta di habla hispano cu ta purba yuda nan yiu cu huiswerk no ta yuda mucho si no ta bruha e mucha pasobra nan no sa pronuncia e palabra corectamente. Nan ta keda bruha entre mi pronunciacion y esun di e mayor. Loke mi ta haci pa evita confusion ta graba tur e pronunciacionnan di tur loke mi ta duna den les. Pero esaki ta bira algo positivo tambe pa esnan cu ta papia Papiamento pasobra nan tin mas herment pa por compronde y siña eficientemente.”

Ora ta tende esaki, por bisa cu Villada ta implementando ya caba un sistema di enseñansa multilingual, cual ta gobierno su meta pa introduci como modus operandi bou tur scol. E mes ta wak caba resultado positivo uzando e sistema aki. “Mi por bisa di experiencia cu muchanan cu un bon base den nan lenga materno ta esnan cu mas ta resalta den nan resultadonan. Mi tin un mucha cu apenas tin 6 luna na Aruba y e ta e beste van de klas. Esaki ta pasobra su base ta bon. Pues mi no ta limita mi klas por medio di exigi cu nan haci tur cos den Papiamento. Mi no lo kier pa mita di mi klas keda atras. E trabou di traduccion ta basta trabou pero mi tin e capacidad pasobra mi sa tur 4 idioma, pues e ora ey dicon no?”

Sinembargo e docente hoben no ta dehado cu su muchanan, pasobra despues di purba facilita por medio di tolera uzo di nan idioma materno den nan periodo di transicion, juf ta bira mas streng y cuminsa exigi pa papia Papiamento ora ta necesario y Hulandes ora tin mester ora e ta sigur cu e mucha su habilidad den ambos idioma ya ta na nivel. “E ta keda un intercambio positivo pasobra e muchanan cu ta papia Papiamento ta haya mas conocemento di otro lenganan. Mientras e muchanan cu mayornan di afo ta siña e idioma di Aruba, esnan di Aruba ta siña un idioma di afo.”

Potretnan cortesia di Nicole Villada y Luis Villegas