Corte di prome instancia na Sint Maarten a haya un hoben adulto di 21 aña culpabel di produci y distribui material pornografico envolviendo un mucha muhe menor. Pa e crimen aki corte a sentenci’e na 2 luna suspendi, cu 3 aña di prueba y 200 ora di servicio comunitario, pago di dañonan di $2.460, training pa lidia cu rabia y a prohibi pa e tin contacto cu e victima y su famia.

Sospechoso Alexander Cristopher Rogers a confesa na e crimennan, cual tabata inclui maltrato di su ex pareha riba 16 di januari. Sinembargo el a desmenti cu e lo a distribui material di indole sexual riba internet. El a bisa e hues cu e no ta prepara pa paga pa dañonan di e victima.

Rogers a bisa cu el a manda e video, mustrando un acto di sexo oral, na un amiga na Sint Maarten Vocational Training School durante temporada di examen na fin di aña pasa. E amiga aki a comparti e video riba varios medionan social cu varios grupo riba internet. Despues di esey, e video a bay viral.

Segun fiscal, e acusado lo a ‘ordena’ su amiga pa comparti e imagennan riba internet. E fiscal a bisa cu e adulto hoben tabata sa con internet ta traha hopi bon, mirando cu el a crece cu ‘cyber bullying y revenge porn’. Loke e acusado a haci a trece cune cu e victima, kende tabatin 16 aña di edad na e momento cu e acto a tuma luga, tabata den shock, te cu el a hasta casi comete suicidio. E mucha muhe, cual ta den terapia, a bisa cu e no a duna permiso pa nan comparti e video aki.

Abogado Geert Hatzmann a pidi daño material y inmaterial pa e victima. E suma total cu a pidi tabata $5,345.

Abogado Sjamira Roseburg a pidi pa su cliente wordo considera inocente, ora ta trata di e distribucion di e material pornografico, mirando cu el a manda e video solamente na un persona, kende na su turno a comparti su video cu varios group chatnan y cu un cantidad di persona den su klas.

Rogers a ofrece su disculpa. El a skirbi un carta cual el a lesa durante e tratamento den corte. “Nunca mi a pensa cu e video lo a bay viral. Mi djis kier a mustr’e na un amiga na scol. El a bay for di man y mi ta sinti hopi malo pa via di esey”, el a bisa.

Den su sentencia hues a bisa cu tur persona mag di haci kico nan kier den nan bida priva, incluyendo traha video di nan ‘momentonan intimo’. Asina mes, comparti e video tabata “fout, mas ainda ora menornan ta envolvi. El a afecta e mucha muhe y henter su famia.”

E hues a bisa cu un video mustrando un situacion sexual unda un menor ta envolvi no lo disparce di internet. “E no lo stop”, e hues a bisa, agregando cu e ta kere cu e acusado berdaderamente ta sinti malo pa loke el a haci.