Hobennan cu pa prome biaha a vota den eleccionnan aki di aña 2021, tambe tabata presente e dia di ayera pa eherce nan voto manera ta e caso di Nethan Romano cu a deposita su voto na St Anna School na Noord.
Romano cu ta subrino di candidato number 11 riba e lista di partido MEP Shailiny Tromp a expresa cu su experiencia pa loke tabata trata su prome biaha di vota tabata hopi ameno segun el a sigura.
Asina mes, el a splica cu na St Anna School di Noord e no a haya un rij largo manera tabata sucede na otro urnanan, el a tarda aproximadamente tres minuut pa vota y cu esey “tabata un experiencia unico”.
Mirando cu Romano ta subrino di Shailiny Tromp el a menciona cu el a vota pa MEP no pa via di tradicion, sino “mas bien pa e confiansa y e bon trabou cu mi tanta a eherce den parlamento y cu el a duna pe e siguransa cu e lo sigui haci un bon trabou, p’esey mi ta duna mi confiansa cu mi voto pa prome biaha”.
Di su parti, Shailiny Tromp a expresa cu pa su persona esaki tabata algo leuk pa motibo cu su subrino semper tabata forma parti di e team pero esaki ta e prome biaha cu e ta vota y cu e ta contento di mira un grupo grandi di “first time voters”.
Tromp a sigura cu experiencia pa dia di ayera cu e temporada di campaña cu tabata hopi cortico e tabata yega hopi menos casnan na unda cu usualmente nan tabata bishita den periodo di campaña normal, den e simannan aki tabatin e reglamento di no mag di bishita cas, aunke despues e medida aki a wordo elimina el a haci poco campaña den casnan y ademas di esey el a dicidi di haci campaña via e plataformanan Whatsapp, Instagram y Facebook, ademas di corant, TV y radio.
Pa Tromp ayera tabata un dia hopi interesante pero asina mes e ta warda kico lo ta e resultado, di su expectativa el a sigura cu e ta hopi positivo, cu expectativanan halto pa motibo cu di e poco bishitanan na cas cu el a logra di haci tabatin hopi bon ricibimento cu durante e pandemia e programanan di alivio a bin hopi lihe.
“No obstante cu nan a bay atras den salario, tabatin un fondo financiero cu nan por a sobrevivi e temporada manera nan ta bisa den e prome lunanan cu tabatin insiguridad, expectativanan ta hopi positivo, Tromp a finalisa.
