(TMZ) – Hoben conoci online pa ‘gif’ cu a bira viral di su aparicion den e programa “Toddlers and Tiaras” Kailia Posey a fayece na e edad di 16 aña.
Su mama a comparti e noticia di e tragedia pa medio di haci un publicacion riba Facebook, unda cu el a expresa “mi no tin palabra ni pensamento. Un mucha muhe hermoso a bay laga nos. Nos ta pidi pa por fabor duna nos privacidad den e momento aki, mientras nos ta lamenta e perdida di Kailia. Mi baby a bay pa semper.”
Te cu awo, no ta conoci cua tabata e causa pa su fayecimento, sinembargo tin reportahe cu ta indica cu tin un probabilidad cu e causa ta relaciona cu un incidente cu a tuma luga na Washington.
Hopi persona ta conoce Kailia como un strea hoben riba e programa di canal TLC yama “Toddlers and Tiaras.” E programa a keda den aire fro di 2009 te cu aña 2013 y tabata trata tocante e bida di famianan durante preparacion di nan yiunan y muchanan pa competi den competencianan di beyesa.
El a bira popular pa motibo cu a crea un ‘gif’ di su persona tumando un clip di un di e episodionan, den cual su expresion tabata chistoso, y asina a bira un ‘meme’ den e comunidad online conoci como “grinning girl” (mucha muhe hariendo), cual ta un imagen y gif cu te dia di awe ta ser usa riba rednan y plataformanan online.
E tabata conoci como un talento natural, ganando varios competencia. Riba su Instagram tabata por a mira cu aparentemente el a sigui competi durante e añanan.
