E hoben Chaim Marius Anthony De L’Isle, di 21 aña di edad, a fayece na hospital diadomingo atardi despues di a sufri heridanan grave durante un accidente di trafico, unda un auto a alcansa e hoben ora cu e tabata core su bais.
Tabata diabierna ultimo den oranan di atardi cu polis a presenta pa un accidente, unda e hoben ciclista a resulta gravemente herida. E accidente a sosode ora cu e hoben riba bais a wordo alcansa pa un auto.
Segun informacion di Aruba Native, testigonan a conta cu e impacto tabata asina fuerte, cu e hoben a bay basta halto y dal abou hopi duro, pa keda benta riba caminda. Mesora el a wordo transporta pa hospital, unda el a keda interna.
Investigacionnan preliminar realisa door di Polis na e sitio ta indica cu, pa algun motibo, e ciclista a crusa dilanti di e vehiculo. Apesar cu e chauffeur no a haci nada fout, a constata si cu e no tabatin su documentonan di auto den regla.
Segun relato di 24ora.com, Chaim De L’Isle lo a caba di cuminsa traha na Cafe the Paddock, anto riba su dia liber el a dicidi di bay lama. Despues, e tabata rumbo pa SvB pa inscribi su mes, ora cu e accidente a tuma luga.
Ayera, diadomingo dia 28 di december pa 4.35am, dokter Utterbeeck a constata morto di e hoben, naci na Aruba dia 16 di december 1997. Chaim De L’Isle a bira e di dies victima di trafico pa e aña aki. Compara cu dos morto aña pasa, e aña aki a mira un aumento di 500%.
