Mirando cu siman pasa Cede Aruba a tene nan evento di Boluntario di Aña unda nan a honra en total 71 boluntario di diferente organisacion y fundacionnan, Bon Dia Aruba tambe kier a para keto na boluntarionan cu ta e motor di hopi organisacionnan riba nos isla.

E biaha aki nos a sinta cu Yeemei Tam kende ta boluntario pa e asociacion pa amigo y famia di personanan y hobennan cu limitacion mental Sonrisa. E hoben ta yuda cu su trabou boluntario specificamente na Trampolin pa Trabou.

Stimula boluntarionan

Pa subraya e importancia di tin boluntarionan cu ta sirbi nos comunidad sin pidi ningun compensacion ta e rason dicon Cede Aruba a dicidi di tene e evento aki siman pasa. Pero mas importante cu esaki Cede Aruba a expresa durante e evento ta pa stimula boluntarionan di manera cu nan ta motiva pa keda haci e trabou di boluntario.

Esta cu kier preveni cu boluntarionan ta wordo stimula di cierto manera cu nan ta motiva pa sigui haci e trabou, pasobra esaki ta bin di curason. Sinembargo e no ta trabounan cu ta dificil, pues kier enfoca riba haci e experiencia di ta un boluntario lo mas agradabel cu ta posibel.

Hoben boluntario na Trampolin pa Trabou

Pa Yeemei Tam, e experencia di ta un boluntario ta un cu e ta haya masha hopi satisfaccion di dje. Esaki debido na e manera con e personanan cu e ta yuda den su trabou boluntario ‘ta hopi cerca di mi pasobra nan ta e hendenan masha fiel mes’. Apart di disfruta su trabou boluntario hopi, e hoben te hasta ta bay hunto cu e personanan aki na eventonan manera carnaval of cinema. “Nan ta keda semper banda di mi.”

E hoben a conta nos mientras tabata warda e bebidanan cu a ofrece na e evento bek na su luga hunto cu e grupo di hende cu e ta sinti su mes cercano na dje cu actualmente e tin 5 aña mas o menos ta conoce y ta traha cu e hendenan aki.

Despues di a sali di EPI e hoben a haya un trabou na Trampolin pa Trabou. Pero t’asina cu ora e hoben a cuminsa su estudio na IPA e mester a kita for di e trabou normal cu e tabata eherce eynan. Sinembargo e hoben semper a keda pega cu e organisacion.

Motivacion

Riba kico asina e hoben ta haya bunita di e trabou e ta splica cu: “E ta algo hopi bunita pa wak con nan ta sinti nan mes special. Mi ta wak cu nan ta sinti nan mes balora y cu nan ta nifica algo na e mundo aki y nan ta gusta cu tin hende cu ta stima nan. Mi ta sinti mi mes manera un di nan, y nan sa masha bon di esaki. Tur caminda unda nan wak mi nan ta cuminda mi bisando: ey Yeemei!”

E trabou mes cu e hoben ta haci pa e grupo di persona aki ta varia, pero hopi biaha ta envolve actividadnan recreativo. Aunke e hoben tin cu balansa esaki cu trabou y scol, en general e momentonan cu e tin liber e ta dedica na su hendenan.

Sra. Tam ta curasha mas persona pa involucra nan mes cu trabou boluntario pasobra asina nan lo ta yudando personanan cu tin necesidad den nos comunidad pa algun tipo di ayudo. “Bo mes lo realisa e balor ora bo cuminsa cu trabou boluntario.”