Hoben Arubiano boluntario na Operacion Cunucu a duna bon ehempel

Serenity Becker tin 16 aña y tabata un di e boluntarionan den e proyecto di Operacion Cunucu. Den un entrevista exclusivo cu Bon Dia Aruba e ta splica cu el a haci esaki pa e haya experiencia den con e proceso ta pa opera cacho, con nan ta wordo opera entre otro. For di e experiencia el a hasta bay cu un cacho cas e ta conta.

“E cacho cu mi a bay cas cun’e yama Bunny, un señora a bin cu ne y el a duna mi e, mi a pega na dje di biaha. E no tabata bon cu niun hende, ami a hunga cun’e, dun’e amor, y awo e ta na mi cas.”

A puntra Serenity kico a motiva e pa bin yuda como un di e boluntarionan den e proyecto pa sterilisa cacho. El a bisa cu e kier yuda pasobra tin hopi cacho riba caya, y muchanan hoben no ta wak cu un cacho ta manera un hende. Kiermen nan ta dal nan, maltrata nan, nan no ta duna nan cuminda entre otro. Y tur esaki no ta husto pa e cacho. Dicon nos si por tin un dushi bida y dicon nan no. Dicon nan mester ta benta na dump y nos ta drumi dushi riba un cama etc. Pues esaki simplemente no ta husto, Serenity a bisa. 

El a sigui splica cu e tin un amiga cu tambe a yuda cu e proyecto. Banda di esaki el a bisa cu su mama ta hopi orguyoso di dje, cu e ta prefera pa haci algo bon cu su tempo liber manera yuda un cacho, en bes di haci algo malo. Su mama ta contento cu el a adopta un tambe y cu ta yudando pa algun cacho mas por haya cas. 

Den futuro

Den futuro Serenity lo kier bira un assistent di dokter di bestia pa yuda te unda cu e por. “Di aworaki caba mi a cuminsa spaar pa por lo menos traha un luga chikito of pa amplia e espacio den mi cura. Djis pa mi tin mas cacho cu mi por yuda. Of tambe pa mi por paga pa laga opera nan, pues basicamente pa di un of otro manera mi sigui yuda nan.”

Experiencia memorabel

Despues di e experiencia aki, Serenity ta hiba un gran recuerdo cun’e el a bisa cu e no tabata sa cu despues cu opera un cacho homber su testiculo ta hincha, cual mester pone ijs riba dje. “Haciendo esaki despues di un rato, mi a ripara cu gota di awa tabata sali for di e cacho su wowo. Anto e ora mi a realisa cu manera nos ta yora, un cacho tambe yora. Pues mesun dolor cu nos ta sinti nan tambe ta sinti. Pues nos mester tene cuenta con nos ta cuida cacho, pasobra nan tambe tin sentimento,” Serenity a bisa. 

Serenity ta un bon ehempel di locual cu mester tuma luga bou di hobennan na Aruba, nos Arubianonan tambe mester yuda pa combati e problema cu nos tin cu cacho riba caya y cuido di cacho. E cambio di mentalidad ta mester sosode pa e bon ehempel yega cerca nos hobennan. E problema a wordo crea pa generacion tras di generacion den comunidad pues awo comunidad incluyendo companianan local, mester haci tur di su parti pa soluciona esaki tambe y no laga organisacionnan y boluntarionan di afo solamente traha riba nos problema.