E historiado sr. Frank Max Elstak pa duna les den e proyecto “Patriotismo” di Academia Popular Errol Scoop, e la sali di formacion di Movemento Politico Causa Prome.

Elstak ta sali for di e pensamento basico cu elementonan Africano- Curasoleño ta domina den cultura y historia di Corsou. Ta p’esei mester kibra e ignorancia cerca e yiu di Corsou di descendencia Africano. Pa logra esaki mester combati pobresa cultural mental cu un cosmovicion Africano.

Ademas mester ofrece un fluho constante di informacion historico cultural. E formacion emansipatorio mester inclui conocemento di e historia di resistencia, residencia y restauracion di gruponan etnico cultural na Africa y den diaspora Africano. Señor Elstak ta di opinion cu como descendiente Africano mester interpreta historia for di un perspectiva Africano y diaspora Africano. E pensamento ideologico pan- Africano mester ta un guia pa e lucha di emansipasion.

Elstak ta hiba e pensamento cu mester establece reparacion pa restora e herencia tangibel, intangibel y mental Africano. Aplicando e perspectiva cosmovisionario Africano lo yuda e yiu di Corsou bira e centro di su propio liberacion y emansipasion.

Esaki lo habri caminda pa e yiu di Corsou di descendencia Africano recobra su identidad y realmente acepta su mes y sali dilanti pa su propio bienestar. Esaki lo proba e yiu di Corsou por basta si e ke. E yiu di Corsou libera mentalmente lo ta un colectividad cultural cu su propio historia, norma, balor, herencia cultural, historico y natural y cu su propio patrimonionan, heroenan, baluartenan y logronan.

Adoptando e vision cosmico Africano e yiu di Corsou lo bandona e vision cu Europa a impone den dje e ultimo 5 siglonan. Europa a considera e Africano y su descendientenan como suphumano dirigi pa un instinto di animal.

E vision eurocentrico ta considera e Africano sclavisa un victima cu no a logra
compronde y adapta su mes na su estado nobo como catibo. Pa e Europeo sclavisa y
dehumanisa hende ta un prerogativo Europeo y algo masha normal. E socio
inseparabel di e Europeo colonisado tabata e imperio Catolico Romano comanda pa
Papa di Roma.

Resistencia Africano na Africa y den diaspora Africano ta un fenomeno universal
sumamente importante cu ta base central di tur lucha pa emansipasion real. E vision
Europeo no ta reconoce resistencia como un fenomeno universal. Esaki debi cu e
Europeo den su vision eurocentrico ta considera e sistema di sclavitud y comercio di
hende como ideal y perfectamente den cuadro di loke nan ta considera y propaga como
etico. E contrario ta berdad ora nos analisa e atrosidad nan manera genocidio, tortura,
explotacion y dehumanisashon cu e opresor Europeo a comete contra e Africano y su

descendiente den diaspora. Sr. Elstak a trata un lista di lucha y luchado cu a resisti y
duna guia na e lucha y gueranan di resistencia den diáspora Africano.

Tur caminda cu tabata tin sclavitud Africano tabatin resistencia. Un resistencia abierto y scondi. E resistencia tabata total y for di un inicio di e barbaridad Europeo. E resistencia a start na Africa, sigui na bordo di barconan negrero y den diáspora.

Menshonabel ta e prome comunidad cu a resisti canta gloria di liberacion den cabamento di sigo16 y comienso di siglo 17. E comunidad Africano Brasileño Quilombo, Palmares na Brasil Zumbi Dos Palmares tabata e lider di resistencia contra atakenan constante di Hulandes y Portuguesnan.

Elstak a trata tambe Coffy e lider di rebelion na Berbice. Francois Mackandal ta otro gran pensado y luchado. Su vision tabata pa uni tur forsa Africano y core cu tur hende blanco for di Haiti. Disciplina y organisa tur luchado via retnan comunitario.

E meta final tabata: independencia y destruccion di e poder di banconan na Haiti. Di Mackandal a sigui Boukman Duty. Boukman Duty ta para pa resistencia arma. Su vision tabata spiritualidad Africano cu su nucleo visionario cosmologico KEMET.

E ta ser considera e arkitecto filosofico di independencia di Haiti. Parti di e siñansa di Boukman ta cu e ta considera e Dios di e hende blanco e Dios cu ta inspira e blanco pa comete crimen. Pero nos Dios ta inspira nos pa haci cos bon so. Fuera di cu mester lucha pa un victoria militar arma e ta boga tambe pa restauracion cultural.

Un ke otro den liña di siñansa y sabiduria di antiguo KEMET. Finalmente Jean Jacques Dessalines a logra derota trupanan colonial di Napoleon y declara Haiti pais liber y independiente.

E prome gran resultado di resistencia Africano ta Haiti, e prome republica liber cu a
bringa su libertad contra Fransia na 1804. Asina por constata cu sin resistencia nunca lo tin victoria.