E siman aki e paso radical di gobierno di Curaçao pa yuda InselAir financieramente a capta atencion. 15 miyon florin ta bay pa yuda e compania di aviacion tene cabes riba awa. Pero no sin condicion. Gobierno di e isla ta pone como condicion cu temporalmente gobierno ta haya un presencia den e dirigencia di e empresa. Tambe un cierto influencia den con ta inverti e suma cu gobierno ta pone disponibel.
Nos no ta scapa di haci un comparacion cu e situacion di algun aña pasa na Aruba. E tempo ey a pone 1 miyon florin disponibel pa Tiara Air di e fondonan di Aruba Tourism Authority. Pa haci esaki posibel mester a pasa un ley den parlamento. Ora nos tira un bista riba e ley, y su memoria explicativo, nos por ripara cu ningun caminda tin algo poni di condicion pa e parti beneficia cu tabata Tiara. E unico cos cu ta bisa ta cu e compania di aviacion lo a haci esfuerso pa mercadeo pa Aruba na e destinonan den exterior unda nan ta bula. E suma no tabata tampoco un prestamo cu cualkier dia lo mester a bin den caha di ATA atrobe. Pakico no a scoge por ehemplo pa duna e compania e suma como prestamo sin cobra interes; asina ainda lo tabatin cierto presion pa esaki no parce un simpel regalo. Enfin, nos tur por a mira cu esey no a yuda, tambe pasobra mescos Insel cerca Tiara tambe a keda biba e speransa cu cos ta drecha na Venezuela y cu nan lo a haya nan placa, aunke cu un tardansa grandi.
Mester bisa cu ta parce cu e hendenan aki no ta lesa corant. Venezuela tin caba un debe di mas 3 mil miyon dollar relaciona cu aviacion. Hopi compania aereo a prefera di considera nan placa como no recuperable, pero a para nan operacion na Venezuela. No nos companianan, cu a keda bula, pa solamente mira e debe bira mas grandi. Y cu e collapse di Venezuela acercando, e speransa pa recupera e placa aki a bira cero.
Pero e decision pa stop di bula Venezuela tin mas consecuencia. Venezuela ta e di dos mercado turistico mas grandi pa nos. No bula mas lo significa cu ta laga e transporte pa y for di e pais aki na e companianan Venezolano so. E pregunta ta si nan tin e capacidad di asumi responsabilidad pa tanto capacidad di asiento. Muy probablemente e contesta ta no y lo mester acepta cu e fluho di turista di e pais aki lo baha mas ainda pa falta di airlift.
A menos cu pensa riba participacion di gobierno mes den un plan pa apoya airlift for di Aruba pa mantene e fluho manera cu e ta. Ta parce nos dificil pa acepta cu gobierno lo mester bay yuda financieramente pa tene un compania a flote mirando cu parcialmente e placa ta bay diariamente den un bari sin bom na Venezuela. Ganashi di otro destinacion lo mester bay pa compensa e perdidanan aki. Esey ta parce nos un locura. Ademas cu e mesun situacion explosivo na Venezuela ta haci dificil pa predeci kico ta bay pasa den e lunanan nos dilanti. Sano huicio ta bisa nos anto cu ta miho concentra riba algo mas esencial pa nos mes, y esey ta e transporte entre e islanan. Pakico esey ta mas importante?
Gobierno di Curaçao su accion ta parce di ta orienta primeramente riba salvaguardia e transporte entre e islanan. Pa gobierno di Aruba tambe esaki mester ta un prioridad. Nos ta tende storia bunita cada tanto tempo tocante otro alternativa manera un ferry, pero ta parce mas realistico pa no conta cu esey mes. Aviacion ta indispensabel pa mantene comunicacion entre e islanan.
Pero, en general, kico ta e aspectonan cu nos ta mira ta bolbe den practicamente cada intento pa lanta aerolinea na e pais aki? Den kico e fenomeno di ‘hala di manteca’ ta bin dilanti? Esey ta na nos opinion e afan di kier crece demasiado rapido y pasa pa bula cu material di ‘prestigio’: avion grandi y caro cu no ta cuadra cu e grado di desaroyo di e compania.
Demasiado biaha nos a mira caba cu e expansion di e rutanan mas leu ta hiba na un caida den servicio entre e islanan mes, mientras cu e ta un prioridad pa garantisa esaki prome. Den caso di InselAir sigur esaki a hunga un papel importante, banda di e problema financiero na Venezuela. E compania a soporta un avalancha di critica, no solamente pa su tardansanan, pero tambe pa e forma poco profesional cu e personal na tera tabata maneha e situacionnan di stress aki. No tabata nada straño cu e compania a haya carta di preocupacion di diferente banda, entre otro Camara di Comercio di Bonaire y Aruba, unda a toca e tema tambe di derechonan di biahero na momento di atende retraso di vuelo, segun normanan internacional.
Ta recomendabel cu, pa cualkier paso cu mester sigui cu ta exigi participacion gubernamental, pa hacie na un manera mas solido cu biaha pasa.
