Mesun reglanan pa tur ciudadano Hulandes…

Dos biaha pa aña e parlamentarionan di e cuatro paisnan den Reino ta reuni pa papia riba diferente tema di interes comun. No semper ta mira resultado di loke ta discuti den e reunionnan ey. Hopi biaha nos ta haya e impresion cu e politiconan cu ta representa nos, ta confundi, intencionalmente o no, entre nan interesnan como politico, y nos interes como comunidad. Esey ta e caso den henter e pleito eterno tocante e famoso areglo di disputa, unda Hulanda ta confronta un frente cera di e tres islanan. Basicamente henter e asunto no ta nada mas cu e politiconan insular ta desea mas tanto posible di limita e facultadnan cu gobierno di Reino tin pa tuma paso contra gobierno di un pais den Reino, den cuadro di e derecho y obligacionnan cu gobierno tin pa supervisa y garantisa ‘deugdelijk bestuur’ segun Statuut. Mientras cu e asunto aki lo no keda regla satisfactoriamente pa e politiconan di e islanan, simplemente pasobra Hulanda no ta coopera, ta vigente si e papel supervisor di Reino. Y Hulanda (lesa: gobierno di Reino) ta actua. Nos por mira esey recientemente na e ‘hermana’ islanan, pero aki na Aruba tambe.

Y loke ta un constante importante den esaki ta cu e intervencion di Reino ta topa cu resistencia cerca e politico den gobierno local, cu ta mira su operacion limita, pero opinion di pueblo ta husga otro. Logico cu e politico, bao di e capa di ‘interes general’ di e isla ta bringa pa su espacio di maniobra no keda limita, pero nos mester sigui nan ciegamente den nan afan pa por haci malo sin cu ningun hende tin algo di bisa? Asina tambe den e ultimo encuentro entre e partnernan den Reino a papia ampliamente riba ‘integridad’ y con pa aplica esaki. Cu den e consulta aki e islanan no ta nada contento cu e ‘waarschuwend vingertje’ di Hulanda, cu ta pretende cu nan si tin e tema bon bao control, ta di comprende. Pero atrobe no for di punto di bista di ta defende nos interes como comunidad, pero pa maximalisa e espacio pa maniobra impunemente como gobernante di turno. Experiencia di tanto aña ta mustra cu den un cantidad di asunto cu ta toca integridad, e islanan ta faya pa crea e ‘checks and balances’ cu mester existi.

Es mas, nos tin un practica comproba di debilita expresamente e institucionnan cu mester sirbi como tal. Esaki den forma di percura pa nan no haya e medionan financiero y personal adecua cu nan mester, banda di e problema structural di e problema cu tur cos mester bay parlamento unda un mayoria gubernamental ta para cla pa torpedea cualkier intento pa hiba e fayonan ( y eventual delito) mas leu. Cu otro palabra, nos tin un historia comproba di sabotahe di funcionamento di ‘checks and balances’ cu ta haci cu nan no ta ‘checks and balances’ anto. Tanten na Hulanda nan no kier comprende cu cerca nos e cosnan aki no ta funciona manera aya, unda ta normal pa mira un partido den gobierno pone su mes ministro renuncia, y cu aki di ningun manera parlamento ta parti di ‘checks and balances’. Esey e ora ta pidi pa otro acercamento di e asunto. Si e teritorionan insular ta demasiado chikito pa garantisa cu e sistema legal y hudicial ta funciona como debe ser, anto talvez ta necesario pa nos bay den direccion di garantisa cierto uniformidad den ley y den proceso hudicial via leynan di Reino, cu ta obliga tur teritorio pa mantene nan mes na e regimen general di Reino. Kico ta e bentaha? Hopi cos, por ehemplo cu gobierno no por frustra investigacon di Rekenkamer, Centrale Accountantsdienst, Ministerio Publico.

Pero tambe reglanan mas uniforme pa funcionamento di e organonan di gobierno cu ta mas na riesgo pa loke ta soborno y otro tipo di acto no integro. Concretamente nos ta papiando aki di tur trayecto di permiso gubernamental, cu lo haya anto reglanan uniforme di Reino pa nan funcionamento y control interno. Tin di nan cu ya caba ta forma parti, pa nan caracteristicanan, di un trayecto netamente di Reino, manera DIMAS, cu ta parti di e ‘vreemdelingenketen’ y ta maneha aspecto cu ta toca interes di Reino. Nos ta consciente cu inmediatamente ta bin e reaccion di e politiconan cu no kier pa nan espacio di maniobra keda limita, y ta trece e famoso palabra ‘autonomia’ riba mesa. E pregunta corecto semper mester ta: autonomia pa ken? Autonomia pa neglisha regla general di bon gobernacion? Autonomia pa permiti cu ta deshaci, desmantela control normal riba trabao di cierto departamentonan? Y cu ki proposito? Pa haci faboritismo politico mas facil?

Tin un politico cu por mustra nos kico a haci den ultimo 20 aña pa mehora transparencia y actuacion integro y corecto di tanto empleado publico como mandatario? Proximo reunion di consulta den Reino nos ta bolbe tende un monton di palabra bashi, sin cu ta mira un paso pa mehora algo den practica? Despues di tur e escandalonan di ultimo tempo, nos a tende un palabra di cualkier politico kico ta bay drecha?