Pa tercer aña consecutivo, Hilton Aruba Caribbean Resort & Casino ta sponsor e kalender pa organisacion ambiental Aruba Birdlife Conservation. Un organisacion cu e aña aki atrobe mester a enfrenta varios reto cu casonan den corte relaciona cu otorgamento di tereno den area di naturalesa.
E Aruba Bird calender di 2018 a wordo presenta por medio di General Manager di Hilton, Hans-George Roehrbein na boluntarionan di ABC. E calender ta di calidad halto di printing y ocho boluntario di ABC a percura pa e 13 potretnan di parha cu ta inclui den e calender aki.
E Aruba Bird Calenders 2018 por wordo cumpra na Huchada st. Cruz y Best Deal Aruba na Paradera pa Awg. 12.50. Tur ganashi ta bay directo na e fundacion Aruba Birdlife Conservation. “Ta hopi great pa mira cu Hilton Aruba ta un baha mas apoya e conscientisacion di conservacion di nos naturalesa na Aruba,” e organisacion ta subraya.
E aña aki riba 23 di januari a lansa e di 9 calender di parha di Aruba Birdlife Conservation oficialmente. Esun aki tabata consisti di 13 potret di parha, tur saca na Aruba naturalmente, bao di cual Sven Oversteegen tabata e fotografo di mas jong (12 aña) cu a contribui. Un par di dia despues riba dia 30 di januari, su excelencia gobernador di Aruba Alfonso Boekhoudt a ricibi e calender di parha aki for di presidente di e organisacion Greg Peterson.
Na Aruba tin 236 especie di parha registra segun e organisacion a yega di trece dilanti. Cual cu solamente dos di e especienan aki ta endemico na e isla; e shoco y prikichi. Ambos a hunga rolnan principal den e kalender di 2017. Recientemente atrobe e organisacion aki a haya nan mes den un situacion caminda cu tin hopi chens nan lo mester lanta un otro caso pa purba stop un otro proyecto comercial den area di naturalesa na Bubali.
“Nos ta haci esaki pa e futuro generacionnan cu lo mester biba cu tur e decisionnan y cosnan cu nos ta haci awe cu nos naturalesa,” e organisacion a yega di comenta.
