Diaranson atardi Sr. Heintje Ras hunto cu Fundacion Museo di Antiguedad Nos Bieunan a tene un rueda di prensa pa asina trece dilanti informacion ariba e hazaña di 100 dia den Mina di Fosfaat na Seroe Colorado cu lo cuminsa diasabra dia 2 di october 2021 y lo termina dia 9 di januari 2022.
Sr. Ras a splica cu a hazaña aki ta riba nivel internacional na unda cu e nomber di Aruba lo wordo marca ariba e plataforma internacional. E meta di e hazaña ta pa recauda fondo pa asina regala Aruba e proyecto di un museo. “Mi tin cu bisa cu te cu aworaki faltando solamente tres dia pa e hazaña cuminsa, nos ta bisa cu nos ta practicamente cla”.
“Mi persona mes ta completamente cla pa start. Mi tin cu bisa na final tin hopi gradicimento ta tuma luga, pero prome cu nos yega eynan nos ta bisa na nomber di papa dios un miyon di danki pa tur e bendicionnan cu nos a haya y ta hayando y lo bay haya”, Sr. Ras a agrega.
El a splica tambe cu e hazaña lo wordo reconoci pa Guinnes World Records. Sr. Ras cu Guiness Wordl Records a yega na un acuerdo cu representante nan di e compania lo ta na Aruba dia cu mi Sr. Ras sali for di e mina na januari. El a splica tambe cu Guinness World Records ta graba ora y minuut no dia, kiermen si e drenta diasabra atardi 5or, e lo mester sali dia 9 di januari 2021 5or tambe. “Tin hopi dialogo a tuma luga entre ami cu nan y e hazaña ta wordo registra, e ta wordo reconoci na unda cu Aruba su nomber lo bay briya den e buki di Guinness World Records. Tur esunnan cu ta pertenece na e team, e staf lo wordo reconoci tambe”, el a bisa.
Pa locual ta trata ayudo specificamente di e parti di comercio di Aruba Sr. Ras ta indica cu lastimamente e ayudo no tabata loke el a spera. Segun el a splica despues di cuatro aña cu el a bati na tur e portanan cu e mester a bati na Aruba, na e portanan cu e mes a pensa di e instancianan cu mester a yudele y no a haya ayudo el a dicidi di haci e hazaña aki. Durante e preparacion pa e hazaña aki tambe el a bati na varios porta cu tabata hopi dificil, indicando cu casi e no tabatin e apoyo di comercio, “pero danki Dios den e ultimo dos simannan aki Papa Dios a manda su bendicionnan links, rechts, nort, zuid, anto mi ta bisa cu nos ta bendiciona”.
Na final di hazaña Sr. Ras ta prepara pa e obra mes, e museo. El a splica cu e tin full un plan di concepto cu practicamente tur cos, diseño, con grandi e lo ta, con e ta bay bira y nan tin e presupuesto, unda cu na Merca nan a manda pidi quotation di tres edificio, tur tres di diferente tamaño y tin tres prijs caba loke nan mester haci ta solamente dicidi ki tamaño e museo lo bira. “E meta ta pa nos haci e hazaña, recauda fondo, cumpra un tereno of yega cumpra completo”, el a bisa.
Sr. Ras a cuminsa na su cas y despues su cas a bira un museo y aworaki e no ta ni cas ni museo, aworaki e ta un warehouse, segun el a señala. “E ta asina yen di articulo cu ami mes ni mi yiunan no por cana den dje. Aworaki mi tin riba 6 mil articulo historico”.
Sr. Ras a splica tambe un poco di con e parti di cuido di su salu lo bay ta durante e 100 dianan. “E parti di salud ta asina cu mi tin un dokter cu ta bay ta semper on call, si mi sinti mes un tiki incomodo of kico cu ta, e dokter ta wordo yama y e tambe a bay di acuerdo pa ta 24/7 on call pa mi y nos tin un segundo dokter tambe si acaso e toro dokter ta ocupa”, el a bisa.
“Apart di esey e cuerpo di Marinier Kazerne tambe ta ofrece nan parti medico, si acaso tin mester. Rode Kruis tambe ta disponibel pa patruya, tira bista y si tin mester di dje tambe nan ta disponibel. E parti di comemento na cuminsamento tabatin varios opinion y e opcion cu nos a tuma ta cu mi a cambia mi sistema di come. Aworaki mita riba cumindanan mas balansa”, el a agrega.
Pa lcual ta su preparacion el a splica cu tur loke ta bay pasa aki tres dia mester a pasa aña pasa okotber, pero door di e pandemia aña a pone e hazaña on hold. El a splica cu e tin un aña cu ta preparando psicologiamente pa haci e hazaña. “Mi a bay den un parti di meditacion hopi halto y esey a yudami hopi, danki na e maestro Chaco Cornelio y aworaki mi tin cu mescla tur cos hunto pa tin un team den mi mente y eyden mi ta parti e ora e parti spiritual, e parti di comemento, e parti di drumimento y e parti di psicologia, kiermen e preparacion ta mas tanto mental”, Sr. Ras a bisa.
“Ora mi drenta ey bou mi ta bay tin un schedule, mi no ta sinta y keda wak pa 100 dia, mi tin hopi cos di haci ey bou cana, explora, bay riba liña, mi ta bay hopi diep, mi ta skirbi, mi ta pinta, mi ta saca potret. Ora cu mi sali despues di 100 dia mi tin asina hopi punto pa documenta cu mi lo traha un buki y e idea ta pa mi entrega e buki na gobernador di Aruba pa asina trece dilanti pa e muchanan di scol por tin mas historia di fosfaat”, el a agrega.
Sr. Ras a indica cu su yiunan tambe lo forma parti di e hazaña y lo hinca den Guinness World Records. Segun el a splica su yiunan lo cumpli e prome 10 dianan cune den e mina. “2 di october ta cay net pa e vakantie di scol y nan tambe ta bay forma parti di dje, y psicologicamente nan ta bay forma parti di mi poder mental pasobra e prome 10 dia nan ta cu mi, pero despues di e 10 dia ey mi tin cu cuminsa pensa cu ta bay tin 90 dia sin nan”, el a expresa.
