Hiba relacionnan den Reino na otro nivel, na bienestar di ‘ambos banda’

–  Gabinete Mike Eman a informa cu Juan David Yrausquin ta e minister Plenipotencario nobo. Sr. Yrausquin tambe ta drenta bek den e partido AVP.

 

Sr. Yrausquin ta splica cu ta e mes a acerca Prome Minister Eman den e periodo di deliberacionnan cu tabatin pa nombramento di un Gobernador nobo pa Aruba y e conflicto cu a surgi a base di esaki. “Na e momento ey mi a acerca Prome Minister cu mi deseo ta pa aporta na un conclusion exitoso di e periodo di Gobernacion di Gabinete Mike Eman II. Particularmente pa loke ta e relacionnan den Reino y e retonan y oportunidadnan cu tin den e parti aki.”

 

No ta un secreto cu Sr. Yrausquin como minister di Financia tabata den conflicto cu Reino riba e asunto di financia y e echo cu gobernador no kier a firma e presupuesto na 2014. E politico tabata sostene e Prome Minister den su welga di hamber pero finalmente a kibra cu e gabinete y e partido pasobra e Prome Minister a yega na un ‘deal’ cu Reino/Hulanda cu e no tabata di acuerdo cu ne. 

 

Sr. Yrausquin a tuma su retiro como minister di Financia y despues tambe di e partido pa asina bay studia afo. 

 

Awor e ta splica cu ‘den e temporada cu e tabata studiando den exterior el a realisa cu na final di dia tin hopi mas cu ta uni nos di locual ta dividi nos’. “Particularmente pa locual ta trata partido AVP, e principionan Cristian Democrata di e partido, e integridad di nos Prome Minister y e deseo di su persona pa crea oportunidad igual pa cada persona cu ta biba riba e pais aki, ta punto- y metanan cu ami ta uni mi mes cu ne y cu pa mi na final di dia ta surpasa cualkier diferencia di opinion cu por tin riba diferente maneho den Gobernacion.”

 

“Por scoge pa enfoca riba loke ta dividi nan y gasta hopi tempo na energia den e partinan aki, of por scoge pa enfoca riba locual ta uni nos y asina traha conhuntamente pa sigura e bienestar general di e pais y su hendenan, y alabes traha conhuntamente riba e metanan poni den eleccion 2013. Ami a scoge pa e ultimo aki y den e cuadro ey traha estrechamente cu Prome Minister y otro coleganan, fraccion y partido p’asina consolida e esfuersonan grandi cu a wordo haci ultimo añanan pa fortifica finanza y economia di Aruba. 

 

Reino 

Sr. Yrausquin a indica den pasado cu e tin problema cu con Reino/Hulanda ta anda cu e maneho di Aruba, cu no ta cay na fabor di nos isla. Ayera mainta el a bisa hopi cla cu: “Mi lo traha estrechamente cu tur mi coleganan pa crea miho entendimento den Reino.” Y den e relato cu AVP a manda prensa, nan a menciona tambe cu ‘den su combersacion cu Prome Minister Eman e agenda pa hiba e relacionnan den Reino na un otro nivel, na bienestar di ambos banda’.