Hiacintha Thijsen Trimon: No por permiti Aruba converti den un Sodoma y Gomora

Diahuebs merdia Hiacintha Thijsen Trimon a haci entrega na Parlamento di un carta firma door di representantenan di tur religion aki na Aruba. E carta a wordo ricibi door di Parlamentario Sr. Chris Dammers y e ta bay pa tur parlamentarionan unda ta para e preocupacion di e comunidad religioso pa locual ta e amienda di Codigo Civil.

”E cos ta cu ta awo esaki ta bay bira un ley ta p’esey nos ta manifesta. Nunca nos tabata tin ningun problema cu ningun homosexual of lesbian, nan tabata biba nan bida normal anto niun hende tabata preocupa cu nan. Awor nan kier haci esaki un ley pa bay casa homber cu homber anto muhe cu muhe, kico esaki ta bay bira mañan pa Aruba?” Sra. Thijsen ta bisa Bon Dia despues di a puntra su persona pakico ta bringa pa esaki awor siendo cu desde 2007 caba homosexualnan por registra nan matrimonio na Aruba y cualifica pa tur derechonan igual.  Den e carta ta para cu despues cu Sra. Thijsen a entrega nan manifiesto na Prome Minister, na caminda pa su cas dilanti di un bar cu ta situa na Marisol Building pariba di Parlamento, a topa cu Desiree Croes y su pareha cu a cuminsa sunchi otro y ranca lenga manera cu nan a weita Sra. Thijsen. Esaki segun Sra. Thijsen a draai su stoma y ta puntra si ta e tipo di bagamunderia aki lo bai bira destino di Aruba. Segun Sra. Thijsen ta sigui splica, cu entrega di e carta aki nan kier ilustra cu den nos leynan constitucional ningun caminda ta limita cualkier persona di su derecho humano, al contrario, tur homo y lesbian tin e mesun derecho cu cualkier otro persona, mesun derecho di casa homber cu muhe y muhe cu homber cual ta haya mesun derecho cu tur hende.  Sra. Thijsen ta splica cu sinembargo pa pasa un ley scondi den tur scuridad ta nifica traiciona Dios y pueblo. Sra. Thijsen ta puntra pakico tin tanto pura pa pasa e ley aki si entre otro e ley di Abuso di Mucha mester a pasa hopi tempo pasa. ”E ley di abuso sexual mester a pasa ayera, nos tin insiguridad na Aruba. Aworaki den bo cas bo no por drumi trankil mas. Tur esaki ta mas importante cu e ley aki”. Sra. Thijsen ta comenta.

Amienda cierto caminda a wordo mal interpreta

Parlamentario Chris Dammers ta bisa cu e ta bay percura pa e carta aki yega na tur parlamentario pero algo si cu e tin di bisa ta cu dialuna awor nan lo ta tratando primordialmente e Codigo Civil di Aruba caminda lo bay cambia 7 di e 8 bukinan. ”E amienda di diferente forma el a wordo discuti, di diferente manera esaki a wordo interpreta tambe den pueblo. Mi tin di bisa cu te hasta cierto caminda el a wordo poco bruha pasobra e amienda ta discutiendo hustamente cierto aspectonan cu ta wordo poni akiden den e carta cu te hasta lesbian y homosexual ta yiu di Dios y tin un derecho riba e pais aki. ”Sr. Dammers ta bisa. E amienda a wordo cambia tambe na caminda pa haci e hopi mas cla segun Sr. Dammers ta comenta.

 No ta bringando pa matrimonio di mesun sexo

 ”Locual Desiree ta bringando pe no ta pa bin matrimonio di mesun sexo, mas si pa nan tin cierto derechonan mesun derechonan pues cu cualkier otro pareha tin ora nan tin yiu of un cas kico lo pasa cu e bienesnan.” Sr. Dammers ta bisa. Si e amienda mes pasa dialuna awor, ainda tin e discusion pasobra no ta e amienda di Parlamentario Sra. Desiree de Sousa so tin. Segun Sr. Dammers ta bisa tin otro amiendanan cu a wordo entrega cu lo wordo discuti dialuna riba por ehempel otro cosnan di impuesto y mas. ”Nos ta bisa semper, ora amiendanan ta radical, gobierno semper atrobe por bolbe manda esaki pa Raad van Advies pa busca conseho pa wak si e amiendanan cu ta bay wordo entrega ta controversial si of no. Kiermen esaki por wordo wanta paso tin discusion rond di esaki. E amienda ta gewoon a base di e claridad y splicacion den e ley ta pa keda mustra bon cla cu articulonan 31 of 33 si min ta hera,  cu keto bay ta papia cu matrimonio ta entre un homber y un muhe of muhe y homber.” Sr. Dammers ta bisa. Ora cu ta papia di derechonan humano den general, esaki ta entre persona pero e definicion entre homber y muhe a wordo poni dos caminda den e ley pa e keda bon cla cu ningun caminda e amienda aki ta papia di bay haci matrimonio entre persona di mesun sexo. ”Mi ta compronde cu diferente hende di misa, pastoornan cu hopi otro hende tabata bao di impresion cu e amienda aki ta pa regula matrimonio entre mesun sexo cual no tabata e caso.” Sr. Dammers a bisa.