“Mi no por kere e pakico mi ta para aki,” ta e reaccion di Minister Marisol Lopez Tromp den su di dos ronda di contesta ayera nochi. Pasobra ta apenas seis luna pasa el a asumi su tarea como Minister, despues cu a sostene un programa di Gobernacion cu ta basa riba integridad y combati corupcion.

Marisol Lopez Tromp a duna un ilustracion atrobe di tur e casonan di corupcion y tambe problemanan cu el a topa cune den apenas 6 luna cu e ta Minister di Infrastructura, Medio Ambiente y Ordenanza Teritorial.

Kisas locual tabata nobo ta cu a constata cu e diplomanan di e director anterior di Serlimar, ta mustra di ta falsifica, a pesar cu ta un compania di accountancy, Deloitte tabata encarga cu e procedura di busca un hefe pa Serlimar. E ex Director tin un caso contra su retiro, pero e Minister ta convenci cu huez lo tene cuenta cu e aparante falsificiacion di diploma.

Un biaha mas Marisol Lopez Tromp a ilustra e casonan di e personanan cu tabata cobra pa traha na su Ministerio pero cu nunca tabata presente y uno no tabata ni na Aruba, e decision pa sera contract cu Storybrook pa expande Huis van Bewaring pa ubica personanan indocumenta y tambe e huur na Wayaca pa Cuerpo Policial. Segun Lopez Tromp, e contracto cu Storybrook pa Huis van Bewaring a sosode sin envolvimento di DIP y DOW y esaki, no obstante e intencion pa bin cu un ley, no ta cuadra cu reglanan. Ni cuanto emergencia tin, no por cera un contracto cu no ta segun exigencianan di Pais Aruba. Tampoco por firma cu un persona cu no ta doño di un edificio, cu ta e caso di edificionan nobo pa Cuerpo Policial.

Lopez Tromp no ta compronde e actitud comosifuera cu locual el a presenta no ta suficiente alarmante. E documentonan di terenonan y nombramentonan ta djis un ilustracion di algo mas grandi. No por kere cu e ta djis trece un garetia di documento den Parlamento, y es mas, hopi ta parti di un investigacion caba.

Tampoco e ta compronde e reclamo pakico no a bin prome den Parlamento pa ilustra tur e casonan aki, ya cu apenas el a bira Minister cu el a topa cu crisis y pa colmo, e crisis di Covid19 cu a para reunionnan publico. Na momento cu e por a bay Parlamento pa splica, el a haya carta di su partido, dia 5 di juni cu ta hala su atencion y despues, tur fraccion ta sostene un carta di dia 24 di Juli cu ta kita confianza di su persona. Esaki los di e hecho cu su coleganan Minister tambe ta firma di no por traha cune.

Y netamente su empeño tabata pa soluciona problemanan, expone casonan contra integridad y resolve e crisis grandi di Serlimar. E reclamonan cu e lo ta stroba hendenan yega na su partido no mester a conduci cu coalicion ta mira e como e problema. E mester tabata lo contrario. Esta cu lo a apoy’e pa e trabou cu segun e acuerdo, e mester haci a base di integridad.

Lopez Tromp ta haya ironico cu mientras cu su partido, POR , despues di a purba presion’e pa no actua segun regla di bon gobernacion, awor ta e Parlamentarionan di coalicion, particularmente di MEP cu ta presion’e pa prueba pasobra no ta haya cu locual el a trece dilanti ta suficiente pa alarma hende.

Como tal e ta contento cu entre e comienso di e reunion dia 31 di Juli pa awor, tin dos sentencia di huez cu ta dun’e razon den su maneho, cu ta e decision pa laga Fundacion Parke Naciona Aruba sigui cu su tarea autonomo pa determina ken por drenta e parke si of no, y cu por a sigiu cu e surceance van betaling di Serlimar.

E reunion no a termina na momento di ciere di nos edicion. Bon Dia lo amplia riba e contestanan di e Minister den nos siguiente edicion.