Herrick Henriquez director di ATIA: “Si for di comienso tur hende cu ta haci negoshi a paga nan BBO, por ta nos no tabata den situacion aki”

Mirando cu dia 1 di juli ta e fecha den cual impuesto BBO na frontera ta bay drenta na vigor, Bon Dia Aruba a acerca Aruba Trade & Industry Association (ATIA) su director, Herrick Henriquez, pa asina ey amplia un poco mas tocante e topico aki.

ATIA den su opinion ta kere cu e palabra primordial di e ley aki ta “Handelsgoederen”, unda si esaki awor keda den ley manera e ta, e ta bay limita hopi compania pa haya credito, pa motibo cu un handelsgoed “ta literalmente algo cu bo a importa pa re-bende. Si bo a cambia e producto un tiki of bo a haci algo pa e producto cu no ta mescos ora bo ta import’e, bo no ta haya e credito ora bo bende e producto. Esey ta nifica cu e prijs ta bay subi cu 7%,” el a sigura.

Ademas, Henriquez ta recomenda pa cu e palabra Handelsgoederen, por cambia of sak’e for di e ley. E ora ey esaki lo kiermen cu tur producto cu drenta Aruba ta bin na vigor pa credito cu por kita for di e BBO ora ta bende e producto. Si e BBO na frontera ta efectivamente un “tool” of un manera pa hisa e cash flow adelanta di Gobierno, “e ora ey di nos banda nos ta bisa pa kita e palabra Handelsgoederen y tur producto cu drenta Aruba ta haya e credito, pa esey no bay afecta of perhudica algun sector compara cu otro.”

Segun el a splica, e sector di construccion y HORECA ta bisando cu nan no ta haya e credito.

Loke tambe ta pasa ta cu hopi compania ta importa nan mesun cosnan. En bes di bende tur cos, algun di nan ta importa pa na mesun uso, por ehemplo un wholesale cu ta importa su mesun rekinan pa por pone nan productonan riba dje. Esakinan ta productonan cu nan ta cumpra awor y e productonan aki ta bay ta 7% mas caro. En berdad, nan por schrijf af pero e costo di operacionnan ta bay subi pa motibo cu afschrijving tambe ta subi y e https://www.bottomline.com/ukbottom linehttps://www.bottomline.com/uk ta menos.

Esakinan ta algun ehemplo chikito cu nan ta duna unda cu prijsnan ta bay subi. Esaki ta bay afecta e inflacion cu ta un formula na unda e poder di compra ta baha.

Tambe a bira conoci cu Departamento di Impuesto (DIMP) ta bay reforma e impuestonan di importacion, pero ATIA no tin conocemento di ki dia esaki ta bay drenta na vigor: “tecnicamente, e mester drenta na vigor 1 di juli hunto cu e BBO na frontera, pero nos sa cu e ley aworaki ta na Raad van Advies y nos no sa ki dia nan ta bay duna nan advies riba dje. Si e dos leynan aki no ta bay simultaneamente, bo ta bay haya e ora ey un efecto riba bo inflacion. Bo ta bay paga mas invoerrechten y riba dje e BBO na frontera ta bin. E speransa cu nos tin ta pa simultaneamente e dos ley aki drenta na vigor,” Henriquez a sigura.

Gobierno di Aruba mediante diferente comunicado y conferencianan di prensa tambe a splica cu esaki ta pa combati economia informal. Di esaki Henriquez a menciona cu BBO na frontera ta un “hybrid” di un BTW di cual nan ta pro un BTW ainda, pero bon hinca den otro manera IMF a sugeri na 2018, lo cual ta un porcentahe cu un base amplio y tiki excepcion den e sistema di BTW cu a propone tambe cual tabatin un BTW na frontera, loke ta haci cu e ta bay hisa e compliances “pasobra hopi di e hendenan cu ta bende manera riba Vraag and Aanbod na Facebook of cu ta bende cosnan y no paga BBO, awor nan mester bay registra nan productonan y compania pa por haya e credito. Si nan no haya e credito, automaticamente nan productonan ta bay ta mas caro compara cu e personanan cu si ta pagando un BBO awor, pasobra e BBO ta inclui na frontera caba. Esey ta un manera cu nos tambe ta di acuerdo: e por yuda cu compliances y hisa e compliances pa tur hende paga na fairshare. Esey ta e meta cu nos tin cu tur hende ora ta haci negoshi tin cu paga nan BBO. Si tur hende tabata haci esey for di comienso caba por ta nos no tabata den situacion aki,” Herniquez a declara.

Biniendo riba e pregunta: Cuanto impuesto mas comercio por sigui carga? Henriquez a sigura cu “nos ta kere cu comercio no por wanta mas. Comercio cu un aumento ta nifica cu e ta afecta e prijs. Awor tin cu puntra e consumidor cuanto e por wanta. Comerciantenan ta bay hinca e impuesto den nan prijs. Di nos banda nos mes no kier pa prijsnan subi pasobra esey kiermen cu e benta lo baha tambe y esey no ta e idea. P’esey nos ta suplica Departamento di Impuesto tambe pa cuminsa wak esey hopi bon, cu no por keda hisa prijs y tur hende ta bay paga pero ta bay cumpra menos. Kiermen cu importacion ta bay baha y tambe na final di dia e placa cu ta drenta caha di gobierno tambe ta bay baha,” el a comenta.

Ademas el a finalisa cu Aruba ta hopi bendiciona cu despues di pandemia Covid-19 a recupera hopi lihe, pero nan tambe ta mirando cu awor e demanda e pa e producto di Aruba ta bahando caba e aña aki.