Glenda Hernandez, Directora di Departamento di Asunto Social (DAS) durante diaranson ultimo a subraya e echo cu den su experiencia den gobierno, e necesidadnan di cliente no ta suficientemente considera. Alabes e ta mira un falta di vision riba termino largo, pa cual Hernandez kier institui den sector social un fondo y inspeccion social independiente di politica.
Durante e charla titula ‘Colaboracion den sector publico’ (Samenwerken in de publieke sector) organisa pa Universidad di Aruba (UA) su Center for Lifelong Learning (CLL) y Aruba Intitute for Good Governance & Leadership (GG&L), publico presente a dialoga hunto cu Hernandez y Mieke de Droog, vice dean di Faculty of Arts and Science riba e retonan cu gobernacion y sector publico ta enfrentando riba nivel organisatorio.
Den sector publico (gobierno) e echo ta cu cada departamento tin un area di specialisacion cual nan ta traha riba dje, cu un organisacion vertical hopi stricto, cual ta haci colaboracion entre departamentonan un cuestion complica. Pa e rason aki Hernandez a titula su presentacion ‘Traha hunto den sector publico: un necesidad pero un tarea compleho’. Un di e aspectonan cu ta haci traha hunto dificil ta cu cada departamento ta traha manera un isla, enfocando riba aspectonan interno mas cu colabora pa resolve problemanan den sociedad.
‘Necesidad di cliente no ta considera suficientemente den Crisisplan Social’
Dunando e ehempel di sector social, Hernandez a bisa cu ‘casi tur problema ta social’, pero loke nan na Asuntonan Social a cuminsa haci ta haci un analisis di e tareanan cu un caso ta encera, unda por haci un calculacion di cual problemanan ta cay bou cual departamento. Asina por ehempel un caso por cay 29% pa sector social, 18% pa enseñansa, 17% pa husticia y 12% pa salud publico. Di e manera aki por bay wak ki procesonan ta cay bou cua departamento pa asina determina con ta bay duna contenido na e colaboracion entre departamento.
Pero loke ta mas importante den colaboracion ta traha un base solido riba cual e colaboracion por tuma luga. Asina el a indica cu pa Crisisplan Social, mester a traha un registracion central pa tur caso, cual lo keda cla den entre 1 pa 2 luna, pa asina tur instancia cu ta traha riba casonan por ta riba mesun nivel y tin acceso di mesun informacion. Ademas mester traha acuerdonan entre organisacionnan, pa asina ta cla ken ta haci kico, con, y kico pa haci ora un acuerdo no ta cumpli. Pero den su experiencia den sector social na Aruba, e ta mira cu structuralmente a corta fondo di e sector social, cual ta haci colaboracion riba un nivel manera esun di Crisisplan Social dificil. “Ora mi a yega tabatin un plan bunita cu input di Unicef, y hopi bon formula, pero e plan tabata encera 0 florin di presupuesto. Cu esey bo no ta yega niun caminda”, Hernandez a bisa durante e charla.
Riba un pregunta di audiencia, si e proyecto Crisisplan Social ta considera e necesidadnan di cliente suficientemente, Hernandez a contesta bisando no. E ta mira cu loke a considera primordialmente den e plan aki tabata e necesidadnan di e instancianan, manera DAS, pero tambe e fundacionnan cu ta traha hunto cu DAS, ‘cual ta completamente otro cos cu e necesidad di e cliente’. Hernandez ta haya cu nan mester bay mas den direccion di puntra nan clientenan con nan a experiencia e servicio, haci encuestanan riba con por mehora servicio, y en general alinea procesonan cu necesidad di clientenan.
‘Mi meta ta inspeccion y fondo social independiente den 10 aña’
Banda di esaki, Hernandez ta mira cu den sector publico tin falta di vision pa yega na metanan riba termino largo, mirando cu hopi biaha no tin un base mes riba cual por construi esaki. P’esey e directora hopi biaha ta mira cu ta inverti cierto cantidadnan den personal, manera den Crisisplan Social, pero riba esaki e ta puntra su mes ‘bo a inverti den personal pero kico bo a logra of kico ta e meta di esaki? Personal ta djis proceso, unda e meta ta?’.
Den e mesun plan aki e mes a mira cu tabatin un enfoke grandi pa traha di manera curativo, en bes di preventivo. Pero e directora a indica cu el a haya instruccion pa no ahusta e plan, si no simplemente pa drey e. Na final di dia Hernandez lo kier yega na un fondo social independiente di politica, y riba un pregunta di un studiante di Organization, Governance & Management a hasta bisa cu lo ta bon pa inclui sector priva den e fondo aki. “Aki 10 aña mi lo kier wak un inspeccion social y un fondo social independiente, pero pa e yega eynan nos mester tin un base estableci”, Hernandez a bisa. “Un proyecto manera Crisisplan Social ta eventualmente caduca, pues di prome ya bo mester cuminsa pensa con bo ta bay ataca e problemanan riba termino largo”.
