(NLTimes) – Criminalnan cada biaha ta haci uso di hermentnan di AI avansa manera ChatGPT pa crea emailnan fraudulento convincente. Esaki ta aumentando e preocupacion di un ola di atakenan di e tipo aki, conoci como ‘phishing’, specialmente contra victimanan vulnerabel manera negoshinan chikito y personanan di edad avansa.
“Smart chatbot” ta surgiendo tur caminda den añanan recien. E botnan aki por genera texto facilmente, manera email. “ChatGPT ta hopi bon den imita combersacion di ser humano, incluyendo esunnan cu por confundi y gaña hende,” experto den AI Henk van Ess a splica na AD.
‘Phishing’, un metodo di fraude online unda criminalnan por impersona entidadnan legitimo pa obtene data personal di manera ilicito, ta birando cada biaha mas sofistica cu hermentnan di AI manera ChatGPT. E tecnologia aki ta permiti e criminalnan aki pa imita banconan di manera cu ta convence e victima, cual ta haci hopi mas dificil pa e victima por identifica intentonan di fraude.
Segun Ad, setnan di instruccion pa ‘Phishing’ pa ChatGPT ta ser bendi online pa 30 pa 50 dollar pa asina genera mas mensahenan fraudulento.
Esaki ta posee un riesgo y menasa significante pa gruponan cu ta menos familiar cu tecnologia digital, cual posiblemente por haya dificultad den distingui comunicacion fraudulento. Segun Dave Maasland, CEO di compania di siguridad digital Eset Nederland, “Nos ta den un momento unda e tecnologia ta desaroyando na un velocidad cu nos no a premira, cual ta haci dificil pa personanan por sigui e tecnologia na mesun velocidad.” A causa di e diferencia aki den kico tecnologia por haci y e personanan su habilidad pa compronde y navega esaki di manera safe, e mal uso potencial di criminal ta expande, el a remarca.
Data di Europol y investigacion di siguridad cibernetico ta indica cu e criminalnan ya caba ta haci uso di hermentnan di AI manera ChatGPT pa actividadnan ilicito, cu e negoshinan chikito den riesgo particular. Un estudio ehecuta pa I&O cu ta revela un kwart di e negociantenan no ta tumando medidanan pa sigura nan plataforma digital. Industria di asociacionnan ta recomenda cu e negoshinan chikito y mediano ta train nan empleadonan pa mehora nan conscientisacion cibernetico, specialmente enfrenta cu loke ta premira di ta un aumento den email ‘phishing’.
Preocupacionnan ta extende na e industria di banco, unda miedonan ta crece tocante clientenan cu ta birando victima di atakenan cibernetico via chatbot. Samantha Reilly, un specialista ICT na ING, ta enfatisa cu e moda aki particularmente ta menasa SME a causa di nan recursonan digital limita. E ta boga pa un rol gubernamental den educa e negoshinan tocante e riesgonan cu hermentnan di AI manera ChatGPT.
Dave Maasland a haci yamado pa gobierno interveni, incluyendo pasonan pa yuda hende distingui websitenan gubernamental cu esunnan fraudulento. “E ta algo cu tin biaha no ta facil pa hende por sa sigur si e website ta di gobierno of si esaki ta un trampa,” el a splica, advirtiendo di implicacionnan potencial societal si un proporcion grandi di persona stop di usa tecnologia a causa di miedo di crimen cibernetico.
Michiel Steltman, director di Stichting Digitale Infrastructuur Nederland, a argumenta contra depende riba regulacion di AI. “E problema cu criminalnan ta cu nan no ta obedece ley, esaki ta haci cu regulacion no ta yuda aki. Loke tin cu haci ta aumenta e chens cu bo por ser gara ta comete e crimen y mehora e resiliencia,” el a nota.
Un proposicion recien a keda aproba den Parlamento Europeo ya caba a caduca mirando e avance rapido di tecnologia di AI. Rapporteur Bart Groothuis di siguridad cibernetico a expresa cu “mi ta preocupa hopi pa cu AI y e consecuencianan di esaki pa cu nos siguridad. E tecnologia aki no ta trata di bira dos of tres biaha mas sabi pa aña, sino di miyones biaha mas sabi.”
