Herbert Peterson, conoci como ‘Ebby’ ta un musico Arubiano cu un trayectoria musical largo y un experiencia den tocamento di instrumentonan di percusion impresionante.

El a yega di siña for di maestronan reconoci, entre nan, Tito Puente. Tambe el a siña for di musiconan kendenan a yega di toca cu agrupacion musical famoso manera e Sexteto di Joe Cuba cu ta forma parti di e historia musical di nos region Caribeño y Latino Americano.

Ebby cu su 75 aña ta forma parti di un capitulo importante di e enciclopedia musical contemporaneo di Aruba… si un dia e lo wordo skirbi. Durante un entrevista ameno cu a tuma luga un atardi caluroso na Coco Plum den Caya Principal, Ebby cu un bos nostalgico a bay na inicio di su bida musical.

Inicio.
Ebby su prome contacto musical a nace na Wilhelminastraat, banda di ex- Warda di Polis na Playa. E tempo haya banda di Aruba Commercial Bank tabatin un edificio bieu di dos piso unda tabata funciona Club Watapana. Eynan un conhunto cu tabatin e nomber di su sponsor Strea Lucky Strike tabata ensaya tur diahuebs, y Ebby semper tabat’ey.

Ebby a conoce un di e trompetistanan cu tabata Oscar Steba kende tabata traha den un imprenta pabou di Ebby su cas. Durante nan ensayonan tin biaha Ebby tabata tribi di toca e maraca. “Eynan ma cuminsa haya gana pa toca,” el a bisa.

Na cierto momento nan a cuminsa laga Ebby toca maraca of raspa. Pero e prome instrumento cu el a yega di toca oficialmente tabata e kiha. E no por lubida e ritmo: un… dos… tres y cuater. Un biaha esun cu tabata toca e maraca a bira malo y Ebby a haya un chens unico pa toca, pero nunca dilanti sino patras. Asina el a cuminsa toca cu nan, pero den dia mas tanto, tocando e raspa y e campana. Sinembargo Ebby su trabou oficial tabata carga instrumento.

Pa Herbert Peterson e drum semper tabatin un magia musical p’e. Dos cualidad special Ebby tin: Observa y siña, muy specialmente di e maestronan. Simplemente el a cuminsa weitando con e veteranonan tabata toca e drum y e timbal pa asina e por siña e arte musical aki.

E timbal tabata e prome instrumento cu Ebby a cuminsa toca cu un tiki di habilidad. Por cierto, e timbal ta e instrumento preferi di dje, pero drum tambe. Un fecha cu Ebby no por lubida hamas tabata dia 22 di november 1964. E tempo aya Ebby tabata un hobencito di 20 aña, y el a bay toca den Sensacion Musical hunto cu Etty Toppenberg, den un festival di bos na Caribbean Hotel

Siñamento y prome drum.
E dia ey el a cera conoci cu e drummer, Luis Varela kende a bin forma parti di e organisacion musical di Jorge Fasola Orchestra. E orkesta aki tabata compaña e artistanan cu tabata bin pa duna nan show den e prome hotel grandi construi na Aruba. Durante su contacto cu e drummer aki, Ebby a cera un amistad cune. E no a perde tempo pa puntra su maestro Argentino, Valera, riba tecnica di toca, pero tambe lesa nota. Ta asina cu Ebby a cuminsa haya les cerca dje. E tempo aya, Ebby no tabatin e tecnica, e tabata autodidact, pero Varela a bira su maestro.

Na añanan 60, Ebby tabata toca cu Sensacion Musical. El a cumpra su prome drum set producto di e reparticion di e placa cu cada musico tabata haya pa cada toca. Den caya grandi caminda awendia tin e edificio di RBC Bank tabatin un cas di musica, Photo Hanna, eynan Ebby a cumpra su prome drum set. E doño Jacques de Miranda a lag’e pa Ebby paga e instrumento aki den quota, ya sea di 20 of 25 florin, te ora cu e por a cubri e suma total 350 florin.

Herbert Peterson ta un musico cu tambe a haci uzo di su talento pa siña toca algun instrumentonan, manera bongo riba su mes. Pero despues, el a busca e manera di profesionalisa su mes den instrumentonan di percusion.

E proceso aki a bay asina leu cu despues di tempo, ora su maestro Luis Varela no por a toca, Ebby tabata esun cu a bay reemplas’e den Jorge Fasola Orchestra, tocando musica bailabel y durante e show. Den su carera musical e tabatin e suerte of destino tabatin plania tur cos pe. Pues un dia Tito Rodriguez a bin canta den Caribbean Hotel. E dia ey, Ebby a bay toca conga, y Tito a gusta Ebby su estilo di toca. Otro biaha, Ebby a bay cu e timbal y Tito a cuminsa toca un par di piesa riba e timbal.

Despues Tito mes a siña Ebby con pa toca cierto ritmonan. Un dia Ebby a biaha pa Puerto Rico pa hiba algo pa Tito Rodriguez. Durante su estadia na e Isla del Encanto, Tito a invita Ebby pa bay wak show di e Sexteto di Joe Cuba. E dia ey, Ebby tabatin e suerte cu prome cu a cuminsa e show di Joe Cuba, nan tabata toca musica bailabel pa entretene e publico. E ora ey, Tito Rodriguez a recomenda Ebby pa toca e timbal.

E tabata un momento inolvidabel y glorioso pa nos yiu di tera Herbert “Ebby” Peterson. Un ‘privilegio’ manera e mes ta bisa. E ta recorda cu pa e por toca e anochi ey, e mester uza dos caha di Coca Cola pone abou pa e por subi riba dje, pasobra Jimmy Sabater kende tabata e timbalero di e Sexteto di Joe Cuba, tabata asina halto cu Ebby no por alcansa e timbal. Eynan el a saca un potret cu Willy Torres na 1968 (potret publica).

Tito Puente.
Pa e temporada ey, Ebby a cera conoci cu e gran timbalero Tito Puente, danki na e contacto cu e tabatin cu Rene Hernandez kende tabata e pianista y director musical di Tito Rodriguez.

Tito Puente a duna Ebby un par di tips den e hotel cu nan tabata kedando. Eynan Tito Puente a set su famoso timbal, y mientras cu Tito tabata toca tras di e piano, el a pidi Ebby pa bay toca su timbal. “Eynan el a siña mi cierto cos cu mi tin cu aplica,” el a bisa.

E herencia musical aki cu Ebby a haya for di Tito ta un gesto cu e ta aprecia te dia di awe. Tito a bisa mi: “No se lo digas a nadie!” Te ainda Ebby ta aplica e tipnan cu el a siña for di e gran timbalero, Tito Puente.

Igualmente pa loke ta e tocamento di e drum, el a siña for di varios hende, pero muy specialmente di un drummer cu a bin Aruba, Joe Morello, hunto cu su señora na 1974. E ta e famoso drummer di “Take Five.” E ta e persona responsabel pa e tremendo solo di Take Five. Morello no solamente tabata un monster tras di e drum, sino un ‘super gran ser humano,’ segun Ebby.

Asina Ebby a sigui adkiri experiencia y profesionalismo, y el a bay basta mas leu. El a yega di toca cu Rufo Wever y Padu del Caribe y participa den nan show na Tele Aruba. Tambe Ebby di studiante a bira un maestro. El a yega di traha entre 2013-2016 como docente di drums y percusion na School di Harpa y Cuarta di Edgard Kelkboom, y tambe el a toca te ainda den varios ocasion den concierto cu dicho grupo.

Awendia Herbert Peterson su nomber ta reconoci na Aruba y pafo di nos isla. Despues di varios decada cu e ta forma parti di e bida musical di Aruba, ‘Ebby’ Peterson, no sa con nos pueblo ta bay record’e den futuro. Un amigo di dje a yega di bis’e: “Bo ta un icono di Aruba. Solamente cu akinan no ta reconoce bo.”