Ayera mainta durante un conferencia di prensa cu Hensley Davelaar director di Serlimar a trece dilanti cu recogemento di sushi ta obligatorio na tur parti di mundo y esey ta nifica un henter proceso.

Davelaar a duna di conoce cu nan ta hiba un maneho mescos cu otro compania grandi caminda cu e tin nan operacion diario, debenan y entradanan, den caso di Serlimar el a enfoca cu no ta diferente, nan tin nan gastonan y nan ta purba di hiba e maneho di manera responsabel pa cumpli cu tur nan debernan.

Di otro banda, el a menciona cu nan tambe tin nan debitornan cu e compania ta espera cu nan lo cumpli cu nan parti di obligacionnan, nan tin e parti di tarifa residencial cu te ainda nan no a haya e reaccion cu nan ta espera, el a sigura cu nan lo bay keda cu nan campaña di informacion pa conscientisa e comunidad cu esey ta un deber di dos banda, compromiso pa comunidad pa duna servicio y asina nan ta espera cu comunidad lo cumpli cu su responsabilidad.

Di mesun manera, Davelaar a declara cu pa via di campaña contra e compania y contra e ley di Serlimar e combersacion di pago a baha, na fin di aña nan a registra mas o menos 20% di e totalidad cu a paga y esey ta representa un porcentahe hopi abou.

Loke nan kier ta garantisa e continuidad di servicio manera nan ta hacie, Davellar a agrega cu nan ta bay keda cu ‘on time perfomance’ cu nan tin , e calidad di servicio cu nan tin y cu lo cual nan lo kier eleva esey na next level.

Davelaar a splica cu e parti di recogemento di sushi ta e prome paso, pero nan tin henter un cadena di procesamento di sushi cu ta bin despues como proceso di separacion por ehempel, pa despues lo wordo dera na Ser’i Teishi cu ta un operacion cu ta exigi hopi gasto y den manera cu nan ta opera nan tin cu haya bek sea di comercio of di pueblo, esey no ta na e caminda cu mester ta, segun Davellar a sigura, pero eynan nan kier busca e balans y nan tin cu wak locual nan mester paga y locual nan mester haya como entrada.

Asina mes, Davelaar a expresa cu e pago pa e servicio di Serlimar ta obligatorio, den sentido cu e servicio ta wordo duna, e persona tin cu compara esaki cu otro tipo di utilidad manera awa y coriente y Serlimar no ta diferente, e comunidad ta haya e servicio di recogemento di sushi, “nos ta purbando di trece e consciencia ey pa e hende compronde cu bo ta haya servicio y cu ta algo necesario den cualkier poblacion na mundo”, Davelaar a destaca.

Ademas, el a bisa cu un di e servicionan cu tambe nan ta ofrece pa comunidad ta Upcycle Center cu ta ‘taking non profit’ di Serlimar cu e entrada cu nan ta haya di esey nan ta duna pueblo bek, e ta forma un parti aparte di loke ta trata e presupuesto di Serlimar.

Pa finalisa, Davelaar a manifesta cu pa hopi biaha hendenan ta bisa cu 25 florin pa luna ta pa recogemento di sushi so, pero esey ta henter un linea grandi di servicio cu ta wordo duna pa esey”.