Mientras cu e declaracion di e embahador Chavista ta duna muestra di e division interno den e cupula cu ta dirigi Venezuela, gobierno di Maduro ta continua cu limita e posibilidadnan di comunica di oposicion. Antayera, na aeropuerto internacional di Maiquetia, lider opositor y gobernador di estado Miranda, Henrique Capriles a haya tende cu a anula su paspoort, cu consecuencia cu e no por a biaha pa New York. E tabata di bay reuni cu Alto Comisionado di Derecho Humano di ONU, pa expone e casonan di represion den cuadro di e protestanan, cu a inicia dia 4 di april y a laga como 50 morto, mas di 900 herido y casi 2400 aresto. Despues a conoce e noticia cu abogado di Capriles lo ricibi audiencia na Alto Comisionado, na su luga.
Embahador na Nacionnan Uni ta duda den asamblea constituyente di Maduro
E ex ministro di energia y actual embahador na Nacionnan Uni (ONU), Rafael Ramírez, a lansa varios advertencia pa gobierno di Nicolás Maduro encuanto e convocatorio pa un asamblea nacional constituyente.
Den su articulo titula ‘La línea roja’, publica recientemente den e portal Aporrea, Ramírez ta defende e potestad di Maduro pa convoca e proceso, pero ta cuestiona e motibonan di fondo: “Ta convoca na un proceso constituyente pa resolve un situacion politico cu no tin su origen den Constitucion. Si loke ta desea ta habri un espacio pa destranca e proceso politico, nos tin cu asumi esaki comprondiendo cu esey ta e obhetivo y no otro, por locual mester establece un linea cora pa protege e fundamentonan di nos carta magna”.
Tambe e ta adverti cu PSUV, e partido den poder ehecutivo, no ta posee e respaldo popular cu Hugo Chávez tabatin tempo cu el a gana pa prome biaha: “Ta existi un riesgo, ya cu e situacion politico y e corelacion di forsa ta completamente distinto compara cu esunnan cu tabata prevalece den e proceso constituyente di 1999. Nos mester impedi cu por surgi un retroceso.”
Ramírez a haci un yamado pa no “sacrifica, pa ningun calculo politico, ni decision tactico” e elementonan strategico di e Constitucion y ta adverti cu “ta habri un kier atraves di cual elementonan por penetra cu ta pone e revolucion den bari di sushi.”
