Diaranson lider di oposicion na Venezuela Henrique Capriles a nenga cu e ta vincula cu pago di soborno pa e empresa di construccion di Brasil Odebrecht, tocante contratacion na gobernacion di estado Miranda, na centro di Venezuela. Capriles ta gobernador di estado Miranda desde 2008.

“Un articulo di Wall Street Journal ta menciona Capriles, pasobra un funcionario a bisa cu supuestamente Odebrecht a firma contrato cu gobernacion di Miranda. “No ta berdad e supuesto contrato aki, no desde momento cu mi ta den e puesto di gobernador”, Capriles a sigura.

E gobernador a sostene cu bao su mandato e no a haci ningun contrato cu e empresa ey. Diferente na e acusacion aki, e empresa Odebrecht si tabata traha den construccion di metro di ciudad di Los Teques na estado di Miranda, tempo cu Diosdado Cabello tabata gobernador di Miranda.

“Esaki si ta e colmo, gobierno ta esun cu ta contrata Odebrecht y e persona cu ta resulta acusa ta ami”, Capriles a aclara ora cu a solicita na un medio di comunicación cu mester laga e informacion aki cla. Capriles a denuncia tambe cu Contraloria General ta busca elimina e funcionario aki pa participa den eleccion di algun posicion publico, despues cu gobierno a habri un investigacion pa posibel iregularidad den gobierno di Capriles, como gobernador di e di dos estado cu mas poblacion na Venezuela. Capriles tabata deteni durante 4 luna na 2004, despues cu el a den embahada di Cuba durante e golpi di estado di april na 2012, cu a laga ex presidente Hugo Chavez (1999-2013) for di poder. Awor e ta liber, pero a habri e huicio di nobo na 2008. Di otro banda, relaciona cu Odebrecht a sali noticia cu e empresa aki a causa perdida di $283 miyon na Peru. Gobierno di Peru a registra un perdida economico di e suma aki pa iregularidad den 23 proyecto cu e empresa di Brasil na e pais entre 1998 y 2015, Contralor General di Peru, Edgar Alarcon a bisa. Tambe autoridadnan a duna restriccion di movimento na ex-primera dama di Peru, Nadine Heredia pa motibo di vinculo cu e scandal di Odebrecht. Heredia por sali for di Peru pero mester bin bek tur luna, pasobra e ta investiga pa delito di labamento di placa, cu presuntamente el a usa pa financia campaña electoral di su casa Ollanta Humala, ken tabata presidente di Peru.