Ayera representantenan di e dos partidonan grandi, esta AVP y MEP, a reuni cu polis relaciona cu parada di auto cu e dos partidonan aki kier a tene diadomingo proximo.

Vocero di Cuerpo Policial, Lito Lacle a mustra cu e dos partidonan a yega na un acuerdo mutuo caminda e di dos partidonan a dicidi di abstene na tene un parada y nan lo hiba nan campaña normal den barionan rond Aruba y cu Polisnan lo supervisa esakinan.

Presidente di MEP, Hendrik Tevreden a mustra di parti di MEP cu sano huicio a prevalece y pa evita un discusion riba e asunto aki, a dicidi conhuntamente cu ningun di dos partido lo tene un parada y cu partido MEP lo sigui cu su campaña di bishita nan simpatisantenan den barionan rond Aruba y asina alivia e posibel presion y tension cu e actividadnan aki lo trece principalmente pa e polisnan cu tabatin un trabou pisa e ultimo aña cu e pandemia.

MEP tabata e prome pa entrega peticion pa parada. Pero Tevreden a mustra rida dos decision di Corte den pasado, esta cu den uno ta e partido cu haci e solicitud prome a haya e permiso pero tin otro decision di Corte cu e partido cu ta esun di mas grandi den Parlamento, lo ta esun cu lo haya permiso pa e parada aki. Esaki ta nifica cu Polis lo por scoge pa haci dos, sea esun mas grandi den Parlamento of lo tira lot. Nan a scoge pa tira lot. Si esaki sosode e lo por bira algo cu lo haya un parada clandestino, sin cu mester.

Mep a conclui cu ta miho pa yega na un acuerdo y laga e campaña finalisa den trankilidad, sin pleito. Eleccion no ta soalmente parada pa midi forsa, pero ta tempo pa informa pueblo di kico ta e vision di e partido pa cu e pais. “E tempo ta exigi liderazgo serio y no uno cu ta midi forsa den un parada.”

Tevreden a mustra cu MEP ta kere cu door di e acuerdo aki entre e dos partidonan, esaki lo elimina cualkier situacion di discusion mas largo y asina un siman prome cu eleccion, e ambiente lo ta mucho mas calmo y tur dos partido lo por sigui cu nan actividadnan den barionan rond Aruba.

“Den momentonan di crisis asina, nos tin cu tuma liderazgo, tuma decisionnan cu kisas ta bay contra di loke nos ta custumbra, pero cu ta garantisa e pas y trankilidad den pueblo. Un decision cu ta mas responsabel pa henter e pais y e votadonan.”

E presidente di MEP a mustra cu su partido lo sigui cu bishitanan den barionan, intensivando esakinan cu bishitanan na cas di votadonan.