Desde cu e proceso di bin cu un facilidad pa taxistanan na aeropuerto cuminsa prome cu aña 2012, ya caba e palabracionnan kico ta e ideanan cu tin riba mesa, na ningun momento a priminti un cantina na e taxistanan, loke a pasa di dje, si a elabora riba dje y a haci esaki realidad, ta e facilidad, unda cu awor aki e taxistanan por sinta, si nan mester warda, nan por sinta warda un rato y haci uzo di tur e facilidad eynan, pagando anualmente un suma relativamente abao, pa tur loke e facilidadnan aki ta costa, no solamente pa construi y pone tur e ekiponan eynan, pero tambe e parti di mantencion cu ta hopi importante cu e gastonan ta sigui core durante henter aña, segun vocero di aeropuerto, Hendrick Croes.
Construccion
E ta splica cu desde dia 1 di september 2012 ya caba Aeropuerto a construi un facilidad pa taxistanan por para ora cu nan ta wardando cierto vuelonan pa Aruba. Tambe a pone na e mesun facilidad aki baño pa nan. A pone tambe “vendingmachines” caminda nan por cumpra algo di come y di bebe. Tambe nan ta ricibi notificacionnan riba screen cu tin riba e facilidad aki si un vuelo tin retraso of a baha, nan por mira tur e informacionnan aki di biaha. Esaki wordo traha pa un grupo di 400 taxista cu a cera e acuerdo hunto cu aeropuerto di Aruba pa asina nan por haci uzo di e facilidad y no solamente e facilidad, pero di biaha tambe e prome caminda di core, cu ta e caminda cu ta pasa net dilanti di aeropuerto unda cu nan ta para den e fila y busca e turista of e pasahero cu mester haci uzo di taxi e momento ey.
Di un otro banda di parti di aeropuerto tin cierto otro facilidadnan, otro caminda cu nan por cumpra algo di come y di bebe. Tin un minimarket, tin un restaurant, tin un cafe, tin e parti di Cinnabon parti paden, unda cu tin diferente opcionnan cu nan tambe por haci uzo di dje, si nan tin mester pa cumpra algo pa come, algo pa bebe. Si nan no ta haci uzo di e “vendingmachines”plus e cooler cu tin pa nan na e facilidad aki.
No tin mester di cantina
No ta asina den punto di bista di aeropuerto, un cantina no ta realmente necesario tampoco, mirando si e servicio cu un taxista tin cu duna ta yega e aeropuerto, busca e pasahero y bay di biaha of si tin un pasahero, e ta drop e pasahero y ta sigui. Ta supuestamente di ta un trabao cu ta un fluho continuo.
Ta mira e facilidad aki como uno cu mester por draai riba su mes. No tin tanto cambio cu mester tuma luga, Croes a splica. E ta djis pa percura pa e fluho di e taxistanan mester keda uno continuo.
Departamento di comercio
Por ultimo, tur e taxistanan cu a cera e acuerdo cu aeropuerto di Aruba tin contacto cu e departamento di comercio, unda cu regularmente ta duna nan informacion si tin mester. Si nan tin algo pa trece dilanti, nan por tuma contacto cu e departamento aki.
