Durante 28 aña sr. Arturo “Tuyo” Werleman a traha como director di Fundacion Pa Persona cu un Limitacion Intelectual Aruba (SVGA), unda el a conoce di cerca e cualidad di nan clientenan cu ta hendenan special.
E tin conocemento riba enfermeria, psikiatria social y maneho riba nivel di HBO, y haciendo uzo di su profesionalismo el a bin cu un plan di maneho caminda -segun su pensamento- e clientenan mester bira menos dependiente di nan famia, y mas independiente pa nan por desaroya riba su mes como cualkier ser humano.
Cambio di vision
Ora cu el a drenta den e fundacion aki cu tin mas cu 50 aña di existencia, e tabata den un forma cu apesar di su infrastructura, e no tabatin un vision unda nan kier yega y unda nan kier bay. Esaki ta e punto fundamental cu sr. Werleman a traha pa e fundacion. Ya cu ora el a yega nan departamentonan tabata trahando mas bien como pasadia, caminda e cliente tabata bin pa realisa algun actividad pa pasa nan oranan, pero e no tabata fiha riba un meta di siña y desaroya nan clientenan.
El a bin cu e idea cu e personanan aki tin e mesun derecho cu otro hende den comunidad. Nan lo mester tin derecho riba labor, vivienda, y nan lo mester por ta deportista, artista y tambe riba tur e nivel di oportunidad cu e comunidad ta duna na e ciudadano, nos hendenan special tambe mester por haci esey, segun sr. Werleman.
P’esey ora cu el a drenta el a bin cu un plan di maneho caminda e actividad a cambia, nan clientenan cu a yega lo por ta prepara pa un actividad laboral of profesional. Un por ta stricado di paña, labado di auto, hardinero, coki, etc.
Trahadonan responsabel
Segun sr. Werleman e trahado aki tin caracteristica particular di gran balor cerca un doño di trabou, ya cu no solamente nan ta contribui cu un obra social, sino cu nan ta trahado responsabel y cumplido. “Si bo bise yega 7’or, e ta yega 6’or y mey”, el a bisa.
Ademas ora cu bo ta duna nan un tarea e ta haci e tarea sin falta di concentracion of perdemento di tempo. Nan ta haci nan trabou al pie de la letra, y nan ta extremadamente honesto tambe. “Bo ta sigur cu e traha pa bo y e lo traha bon pa bo”, segun sr. Werleman.
Nan a siña haci cosnan cu nunca nan a mag di haci na nan cas pasobra e famianan tabatin miedo y prohibi pa ehempel pa nan ser keri special no bay stoof pasobra e por kima su mes, of nan ta kima e cuminda. Nan a siña nan clientenan traha cu stoof y traha un cuminda a base di diferente modelonan mas tanto grafico.
Na momento cu nan a cambia nan actividad y haci nan clientenan mas productivo laboral y personalmente, nan a cuminsa sondea den comunidad sitionan unda nan lo por traha y sigui desaroya. E ta reconoce cu un prome sitio cu a habri su porta pa hendenan special bay traha ta Manchebo Beach hotel, cu a acepta dos di nan clientenan cu ainda ta trahando den cushina pa mas cu dos decada.
Actualmente nan tin mas hendenan special trahando den diferente caminda entre nan hotelnan, tambe na Kooyman, Fantastic Garden, Fundacion pa Nos Burico, etc… nan ta traha un biaha pa siman.
“Na momento cu un resulta bon den e trabou e ta drenta automaticamente na e parti di labor. E ta integra na e comunidad. Nos kier pa e hendenan aki ta wordo integra, respeta y acepta”, segun sr. Werleman.
