Hendenan muhe Iraki tin miedo pa aumento di matrimonio infantil debi na cambio den ley

(AP) — Shaimaa Saadoun ta tormenta pa e recuerdo di a ser forsa den un matrimonio abusivo cu un homber di 39 aña tempo e tabatin apenas 13 aña. Su famia pober cerca di estado sur di Irak di Basora tabata spera cu e bienes di oro y placa lo a yuda mehora nan circunstancia. Su casa a presenta un pida paña mancha cu sanger pa proba su virginidad despues di e anochi di casamento.

“Mi tabata spera di ta un esposa y mama tempo mi tabata djis un mucha. Ningun mucha of adolescente mester ser forsa pa biba loke mi a biba y experencia,” Saadoun a bisa, ken a divorcia di su casa ora e tabatin 30 aña di edad, actualmente tin 44 aña.

E matrimonio di Saadoun tabata ilegal, aunke un hues, liga na su casa, a aproba esaki. Ley Iraki ta bisa cu e edad minimo pa casa ta 18 den mayoria caso.

Pero matrimonionan asina cu mucha muhe pronto por keda aproba pa estado. Parlamento Iraki ta considerando cambionan legal controversial cu lo duna autoridadnan religioso mas poder riba asuntonan di derecho di famia, algo cu gruponan di derecho humano y opositornan ta adverti cu por habri e porta pa matrimonio cu mucha muhe di 9 aña.

E ley lo permiti clero pa determina con hoben un mucha muhe por casa.

Presion pa cambionan a bini principalmente di fraccionnan politico poderoso Chiita musulman respalda pa lidernan religioso cu a critica mas y mas loke nan ta describi como un imposicion di normanan cultural occidental riba Irak cu mayoria musulman. Na april, parlamento a pasa un ley severo contra LGBTQ+.

E amiendanan proponi lo permiti e Irakinan pa acudi na cortenan religioso den asuntonan di derecho di famia, incluyendo matrimonio, cu actualmente ta e alcance exclusivo di cortenan civil.

Esaki lo permiti clerigonan dicidi a base di nan interpretacion di Sharia of ley Islamico, en bes di leinan nacional. Algun clero ta interpreta ley di Sharia como permiti e matrimonio di mucha muhe den nan prome adolescencia, of hasta na edad di 9 aña, segun e scol Jafari di ley Islamico, sigui pa hopi autoridad religioso Chiita na Irak.

Hopi hende muhe Iraki a reacciona cu horor, organisando protestanan pafo di parlamento y campañando riba medionan social contra e cambionan.

“Legisla un ley cu ta hiba e pais 1.500 aña back ta bergonsoso… y nos lo sigui rechas’e te na nos ultimo rosea,” Heba al-Dabbouni, un activista cu a participa den un protesta na augustus, a bisa. “E trabou di e parlamento di Irak ta pa pasa leynan cu ta mehora e normanan di sociedad.”