Ayera na nivel mundial a celebra e Dia Internacional di Hende Muhe caminda Gobierno di Aruba a organisa e evento denomina “Celebracion, Inspira, Inclusion di Hende Muhe” e cual a keda “sold out” den poco dianan caminda hendenan muhe di Aruba di tur area a acerca na Renaissance Convention Center pa celebra e dia aki.

Cu e presencia di prome minister Evelyn Wever-Croes, ken a discuti diferente punto den e conferencia aki, entre nan mas relevante ta, cu hende muhe mester na ta mesa pa dialoga na unda el a bisa cu “si di berdad nos kier pa tene cuenta cu lo cual pa nos ta importante den nos prioridadnan, nos preocupacionnan, nos mester ta na mesa y e ora ey por verwacht di berdad cu ta tene cuenta cu loke ta nos preocupacionnan “ el a sigura.

Tema di salud di hende muhe, abuso contra hende muhe y discriminacion di hende muhe ta miho atendi si tin un hende muhe sinta na mesa manera prome minister ta señala.

Ademas, el a informa cu nan a haci un estudio di con e posicion di hende muhe ta na Aruba, kico mester haci pa sigui desaroya y kico ta e retonan, nan a pone esey den e gender policy e cual a sali publica dos aña pasa.

Den e gender policy aki, nan a saca un capitulo e cual ta esun di mas grandi, e cual ta abuso contra hende muhe y mucha muhe, pa motibo cu nan a mira cu abuso contra muchanan muhe ta cuminsa den edadnan hoben y e ta un problema pa e generacion ey tambe, pa e motibo ey el a bisa cu nan ta enfocando hopi riba e parti aki caminda ayera nan a anuncia e comision oficialmente cu tambe tin di haber con hende muhenan ta lanta nan yiunan hende homber, “pasobra lamentablemente ainda parti di e abusonan cu tin ta e rais, ta bin di e hecho cu hende homber ta kere cu e ta mas cu hende muhe y p’esey bo por abusa di dje fisicamente, eynan mi ta kere cu nos mester traha mas riba conscientisacion, el a sigura.

Ademas, a trece dilanti cu tin hopi reto como pais, pandemia Covid-19 no a yuda tampoco pero aworaki nan ta bay concentra riba haya sa kico nan tin cu haci pa por ehemplo stop e abuso aki.

Den e conferencia, Central Bureau of Statistis Aruba (CBS) a presenta e resultadonan di e encuesta “Inclusion di hende muhe na Aruba” e cual tabatin como meta pa tin un bista di e inclusion di hende muhe na Aruba, tabata encera ponencianan tocante inclusion di hende muhe na Aruba riba diferente area manera den nan hogar, trabou, organisacionnan di boluntario, clubnan di deporte, institucionnan religioso (misa/iglesia), gobierno, medionan di comunicacion y medionan social.

Tocante con e hendenan muhe na Aruba ta contribui, segun e encuesta un 5% a contesta cu nan no ta contribui na nada, pa esaki Desire Helder director di CBS a declara cu e hendenan cu a contesta esaki mester educa nan mas miho, e top 5 ta indica cu 13% ta contribui na sector construccion, 5% na sector di ciencia y investigacion, 8% na sector di agricultura y pesca, 5% na sector di transporte y 3% na sector di telecomunicacion.

Riba e pregunta si hende muhe tin acceso igual na hende homber den diferente servicio, 94% a indica cu si den areanan di educacion, 92% na plataformanan unda nan por expone nan arte y creatividad, 92% pa ta doño di nan mesun negoshi.

Tocante esnan cu a indica cu hende muhe no tin e mesun acceso cu hende homber, 39% no tin acceso na un trabou bon paga, 37% a indica cu hende muhe tin menos acceso na trabounan segun nan mesun experiencia of nivel di educacion y un 36% a bisa cu hende muhe tin menos acceso pa ta miembro di un Raad van Advies of un directiva. Pa esaki, Helder a sigura cu tin cu enfoca mas riba e punto aki pa haci esey mas miho.

Pa loke ta trata e parti unda hendenan muhe mester ta mas activo, den e top 5 a bisa cu 91% mester ta mas activo den gobierno, 91% mas activo den Parlamento di Aruba, 90% den deportenan, 89% den institutonan financiero y di seguronan y 88% den arte y entretenimento.

Na unda a señala cu no kier mira mas e presencia di hendenan muhe, a indica cu 42% den tiendanan, 39% den sector di construccion, 34% den sector di hotel y restaurantnan, 30% den administracion y 28% den transporte publico.

Ora ta papia di un contribucion pa economia di Aruba, e tres ocupacion mas importante ta servicio y benta cu 29%, sector administrativo cu 19% y funcionnan elemental cu 16%, 48% di e personanan cu ta den funcion di manager ta hende muhe. E top 3 di e sector ta ubica den sector di hotelnan y restaurant, comercio, y actividadnan di trabou social y salud publico.