E dia informativo cu e titulo subhetivo ‘Futuro No Ta Warda’ riba tema di digitalisacion y e retonan cu esaki ta trece cune, a conta cu un gran cantidad di publico tanto di e sector publico como priva. Inicialmente e cantidad di participante a wordo calcula alrededor di shen hende, pero e tabata mas cu 150 participante.
Director di Archivo Nacional Aruba (ANA), Raymond Hernandez a bisa cu esaki ta muestra cu tin hopi interes pa esaki. Pero el a keda hopi asombra pa e cantidad di pregunta. E seccion di pregunta a dura casi un ora. E ta haya cu esaki ta un muestra cu tin preocupacionnan den e trabou cu nan como hendenan di archivo of documentacion ta haci.
Tabatin diferente presentacion, entre otro di Parlamentario Daphne Lejuez y tambe nan a ricibi un mensahe manda digitalmente di Minister Presidente cu den e ocasion aki tabata na New York. Tambe a participa diferente orado invita di Hulanda, entre nan Marens Engelhard kende ta Director di Nationaal Archief Nederland, kende a basa su presenta riba con henter e desaroyo di archivamento ta bay y tambe archivamento digital. Esaki tabata un asunto cu a genera hopi pregunta, ya cu ta existi un preocupacion comun den e mundo aki.
E preocupacion tin di haci cu e periodo yama Digital Dark Ages, caminda tin hopi informacion, pero e no ta accesibel. Of tambe e informacion a wordo perdi; of bo no sa unda bo por haya nan. Hernandez a bisa cu e discusion aki tambe ta existi cerca nos, pero e unico bentaha di dje ta cu Hulanda ta hopi mas avansa den e discusion aki cu nos.
Expertonan.
Tambe nan a conta cu presencia di otro experto di Hulanda riba tereno di archivo, Paul Geerders kende a basa su charla riba e transicion di archivo di papel pa e parti digital. Un proceso cu ta tumando luga den diferente departamento y instancia di gobierno.
Como experto, Geerders a duna un bista no solamente riba e tereno di preocupacion aki cu a genera hopi pregunta basicamente riba kico bo ta bay haci cu e informacion ey? Pa kende e informacion ta habri? Ki sorto di standard of normanan ta wordo uza pa e conservacion digital di e informacion? Y tambe meta-data of metodo cu bo tin cu uza pa asina e documentonan ta wordo haya lihe bek.
Pero tambe e experto aki a duna un bista di speransa cu si nos ta na tempo cu e actuacion necesario pa yega na miho solucionnan, no nos mester tin e preocupacion cu despues e informacion archiva digitalmente no ta accesibel.
Hernandez ta kere cu esaki tabata e preocupacion principal cu a resalta den henter dia di informacion aki. Director di ANA a indica cu tur hende ta papiando riba e parti digital, pero no ta existi e intercambio entre servicionan ainda na Aruba. Con nos ta bay percura pa e era digital ta drenta cerca nos. Mara na esaki e preparacion di hendenan cu tin cu traha den e mundo aki.
Director di ANA tabata hopi satisfecho di e reaccion positivo a base di e compliment cu nan a haya, pero tambe e otro partnernan manera e fundacion ADA cu a percura pa e dia di informacion aki. Archivo Nacional Aruba (ANA) hunto cu fundacion Amigonan Di Archivo (ADA) tabata un di e partnernan organisado di e actividad aki cu a wordo teni den cuadro di International Day for Universal Access to Information Day.
